أنا بجرى جوا نفسى والخطوة مكتفانى معصور الحزن فيا وشارب من كيعانى فدادين الزرع بارت والمية اتجمدت والقمح سنابله فضيت وازاى تتعبى تانى *** شهيدنا فى غزة ياللى صوتك ساكن ودانى لو كنت أقدر أساعدك تارك.. كان جبته ليك لكن ظلم الصهاينة كتف جواى لسانى كسروا جرس الكنايس حرمونى من أذانى خلونى أحس إنى مكتوب على وشى جانى *** لو موج البحر يعلى هيغطى الصيادين لو صوتى فى بقى يعلى رايحه تسده الإدين ما الخوف فى القلب يزرع عشق الآه والأنين *** شهداؤنا فى غزة نأسف إحنا شعب الكلام نتنازل عن حقوقنا وحجتنا السلام زمانا تاه ما بينا من كتر الاحتجاج نرفض.. نشجب.. ندين ونقولها باحترام *** قدامى طريق يخوف شايف فيه شوك وموت سامع من غزة ميت بيصيح وبأعلى صوت ياللى بتشجب وترفض فينك.. متخبى فين؟ *** يازرع انشف فى أرضك مش محتاجين خضار وحياة أمك فى عرضك خلصنا من الحصار لابسين قناع مزيف تحت القناع مرار فاكرين الكدب خيبة وأتارى الكدب عار خايف لاكدب وأقول وطنى حبيبى الوطن الأصغر يوم ورا يوم أحلامه بتصغر وانكساراته ماليه حياته غزة بتصرخ.. وح تتدمر غزة بتصرخ.. وح تتدمر حاتم السمان - سوهاج