القرارات فيك صارت غريبة شقتى وادفع عليها ضريبة بكرة يدفعونى على الغسالة والثلاجة والمروحة التوشيبا وعلى البقرة والجاموسة والحمار وعلى أرض الزريبة وعلى أردب غلة لو أشيلو لأولادى فى زكيبة لكن مهما يعملوا فيا بحبك يا أغلى حبيبة ■ ■ ■ طول عمرى يا حبيبتى صبور أطلع من طابور لطابور من الأنبوبة للرغيف لذل الجزار ووصل النور هلكان وتعبان داير ياعينى فى ساقية تايه بلف وأدور وحامد ربنا وراضى بالقليل ورافض أثور وأوضاعك صارت مريبة ولسه بحبك يا أغلى حبيبة ■ ■ ■ فلوسك سرقوها الأكابر والفقير ساكن فى المقابر والنفاق وصل المنابر وأنا عندى أمل وصابر وحامد ربى وشاكر هو قادر يفك كربك له فى كل أمر حكمة وفى حكمته أسرار عجيبة دوام الحال من المحال ولسه بحبك يا أغلى حبيبة ■ ■ ■ فيك الوظيفة زى الآثار والبطالة فى كل دار والشباب عايش فى حوسة والكوسة أغلى من الخيار والضمير واخد إجازة وعالقهوة بيلعب قمار والحكيم عنده أمل وحلمه بعد الليل ييجى نهار يمحى الظلمة العصيبة ولسه بحبك يا أغلى حبيبة أحمد خليل السوهاجى- عامل بجامعة سوهاج
