ظالمين الكرسى ليه الكرسى بإيده إيه الحق مش عليه الحق ع اللى عنده أغلى من عينيه مرة يشوح بايده مره يدلدل رجليه الباشا أصله حالف أبداً مايقوم من عليه واختلف وخالف ماحد يقدر عليه وطبعاً إنت عارف أصل الحكاية إيه ظالمين الكرسى ليه الكرسى مصرى أصيل عايش حياته حزين وخشبه زان ومتين يستحمل الظالمين متسمر بقولة نعم مدهون بكلمة آمين وهتعمل إيه يا مسكين وناس فوقيه لازقين وناس رايحين جايين عايشين سنين تايهين عطشانه قولة (لأ) مفطومة كلمة آمين ظالمين الكرسى ليه الكرسى دا غلبان طول النهار شقيان داير فى عقله سؤال ليه الزرع مال وليه هو جعان لا حد بيقوله مالك ولا ازىّ العيال الكرسى منا اشتكى ورفع إيده وبكى لو فيه لسان كان حكى عن صاحب الهشتكا ومروج البشتكا وزارع الهمبكا وبايع الفبركا ومسبب الدربكا الكرسى منا اشتكى وقال يارب وبكى ظالمين الكرسى ليه قولى فهمت إيه م الكرسى وم اللى عليه واحد من غير لسان وصاحبه مغمّى عنيه تقولّه ليه؟ وازاى؟ يهزلك رجليه ظالمين الكرسى ليه الكرسى دا ادعوله وادعوا للى عليه وإن كان فيهم عاصى وربك يشل إيديه وطبعاً إنت عارف أصل الحكاية إيه ظالمين الكرسى ليه مصطفى السرتى
