تعالوا نكتبها هذه المرة بالعامية، وتعالوا نكتبها فى هيئة درس مباشر كما علمونا فى كتب المدرسة، وتعالوا نبتعد عن ضجة خناقات السياسة، ونذهب إلى أرض الوجع حيث يجتمع أهلنا وبعض منا فى المدن السياحية فى انتظار دعمكم، لا السخرية منهم، ولا التقليل من الكارثة التى يعيشونها.. تعالوا نكتبها بمنتهى البساطة.. كل سنة وتحديداً فى إجازة الصيف وإجازة نص السنة فى الشتا.. الدكتور محمد.. طبيب العظام المشهور.. بيسافر بره مصر، يصيف أو يشتى ويدّفا، بيسافر مع مراته وأولاده الاتنين.. هما مش كبار قوى عمرهم 12 سنة بس، بس تخيلوا كمان.. الأولاد دول لحد دلوقتى ميعرفوش مثلاً الأقصر وأسوان وعمرهم ما شافوا الآثار العظيمة اللى هناك.. ميعرفوش مثلاً الملكة حتشبثوت إلا من خلال الكتب اللى بيقروها.. ميعرفوش إنهم لو راحوا الأقصر ممكن يشوفوا مقبرة الملكة اللى حكمت مصر 21 سنة.. ويتفرجوا فى وادى الملوك على حاجات تانية كتير عظيمة ومصر بتفتخر بوجودها على أرضها.
مرة سألت الدكتور محمد: «انت ليه مبتسافرش أى مكان جوه مصر يا دكتور، وتحاول تدعم سياحة بلدنا فى ظل الظروف الحالية اللى فعلاً بتحتم علينا المساعدة بأى قدر ممكن فى تنمية السياحة؟.. انت عارف كويس كل الكلام ده يا دكتور مش أنا اللى هقولك.. مش أنا اللى هقولك الاحتياطى الأجنبى وصل لكام دلوقتى..».
رد عليا الدكتور محمد بكلام من نوع.. أصل خدمة الفنادق هنا وحشة.. وإذا كان بعض اللى شغالين فى السياحة بيتعاملوا ب«قرف» مع السياح اللى جايين من بره فمعقول يعاملوا المصريين بشكل كويس..
والولاد لازم يشوفوا بلاد تانية.. أنا من جهتى عملت اللى عليا وقلت للدكتور محمد عن أماكن كتير أنا واثق إن المصريين اللى بيشتغلوا فيها هيعاملوا أى ضيف كويس بغض النظر عن جنسيته وإنه لما يكون مصرى بالذات هيلاقى معاملة أحسن بكتير من اللى بتشوفها بره.. واسأل ناس كتير جربت الأماكن دى هتقولك نفس الكلام.. وكمان يا دكتور مينفعش ولادك يشوفوا أكتر من بلد بره مصر.. وعمرهم ما شافوا الأقصر ولا أسوان مثلاً.
حاول ماتعملش زى الدكتور محمد، من حقه طبعاً يسافر ويتفسح هو وأولاده ويبسطهم ويخليهم يشوفوا الدنيا زى ما بيقول.. بس برضه معلهش بلدنا محتاجة ندعمها فى الأيام دى بأى حاجة خصوصاً لما نكون كده كده بنصرف الفلوس فى مكان تانى مقابل الاستمتاع والانبساط..
فخلى بلدنا ليها جزء من سفرياتك وانبساطك.. والأماكن اللى محدش بيسمع عنها فى مصر كتير، وخدماتها ماتقلش خالص عن أى مكان فى العالم من اللى بيروحهم الدكتور محمد.. أومال إيه الكلام اللى عمالين نقوله ونحفظه من سنين عن حضارة السبعتلاف سنة.. وأعظم ناس فى العالم.. وأطيب شعب.. عايزين الكلام ده يبقى عملى..
وأنا وانت كناس عايزين نسافر ونتبسط، واللى شغال فى مكان سياحى مسئولين عن ده..
دعم السياحة حتى لو كان فى أوقات كتير مرتبط بالسياسة اللى بتحكم البلد.. هو برضه مرتبط بينا كزباين وباللى شغالين فى المجال..
مش عايزين نضيع وقت أكتر من اللى ضاع.. يلا أنا وانت والدكتور محمد ندعم بلدنا بأى حاجة ونسافر الأقصر وأسوان والغردقة وشرم الشيخ وكل مكان يعجبكم ونفسكم تشوفوه وتستمعوا بيه.. يلا بينا.