- النائب العام من شويّة حظر النشر في قضية الفساد بتاعة ال600 مليار جنيه اللي كشف عنها هشام جنينة، ولجنة شكّلها الرئيس وردت على جنينة، وقالت محلصش ومجمع الفساد من سنة 79، وزميلنا إسماعيل الوسيمي إمبارح بالليل نشر في موقع "التحرير" رد من الجهاز المركزي للمحاسبات على بيان اللجنة، طب مين اللي قدّم البلاغ ده أصلاً للنيابة، وهل القرار صح؟
- أقولك، الحظر من حق النيابة حفاظًا على التحقيقات، طب وفين حق المجتمع في المعرفة، هيعرف هيعرف بس ليه "التعتيم والتكتيم"، محدش عارف بس "هتحلو"، أيوة زي ما بقولك كده، المهم لما جنينة هيروح البرلمان هنذيع ولا مش هنذيع، والحظر ده ل "البرلمان" كمان هتحلو آدي الحظر وسنينه .
- وبمناسبة الحظر، إمبارح كان فيه حكم تاريخي من القضاء الإداري بإلغاء قرار النائب العام بحظر النشر في قضية تزوير انتخابات الرئاسة (مرسي _ شفيق) و"الوطن" نشرت مستندات وتفاصيل "رهيبة" من التحقيقات، أبرز ما فيها منع أعضاء اللجنة العليا اللي أشرفت على الانتخابات من السفر، وإن كان فيه تزوووير "فج" ، وأن كان فيه تهديد إخواني باقتحام التحرير لو أعلن فوز مرسي أيووووه ، طب حد فاهم حاجة، طب مين كسب ومين خسر طب وهنستفيد إيه من النشر، طب ومرسي كان ريّس ولا مكنش، طب وشفيق طب طب طب وبعدين .
- وأوعى ده ينسيك أن فيه "شد وجذب معركة جوه البرلمان" دلوقتي بسبب قانون الخدمة المدنية، ومنشورات وملصقات، وخايفين من العمال ينزلوا ويتحشدوا يوم 25 يناير، وناس تقولك لو موافقناش الناس اللي بتقبض على مدار 10 شهور هترجع الأساسي ل"الحكومة"، والناس مش هتقبض شهر فبراير، وتوفيق عكاشة جاب يافطة جديدة لونها أصفر وكتب عليها: "أرفض قانون الخدمة المدنية"، طب آدي إحنا أهو " مربعييين ومستنييين" ايييييييين .
- طب تيجي مستشفى أم المصريين، وسيبك من الكلام ده، فيه واحدة دخلت المستشفى وولدت وبعد ما ولدت "خنقت بنتها"، طب ليه، التحريات قالت إنّها إتجوزت من 4 شهور وأنها "غلطت" مع جوزها قبل الجواز، وقتلت البنت عشان "متتفضحش"، وده في الوقت اللي سيدة في مصر الجديدة رفعت دعوى ضد جوزها عشان تخلعه وليه تخلعه عشان بيعامل القطط وحش، وموّت كام قطة كانت مربياهم وحلفت ل "تخلعه"، طب مين مع مين؟ طب مركزين؟!.
- وبمناسبة المحاكم، النيابة حوّلت للمحكمة أمين شرطة بمطار القاهرة اتفق مع واحد مسافر الإمارات يساعده في تهريب مليون ونصف مليون دولار وياخد 3 آلاف جنيه، قوم إيه، قوم أمين الشرطة ده مياخدش ال3 آلاف ويسكت، لا ده "لطش" المليون ونص، والراكب وصل الإمارات و"لطم" ورجع بلغ، والنيابة حبسته هو وأمين الشرطة، وحولتهم النهاردة للجنايات، أهو الراجل سافر الإمارات ورجع مصر عشان يبلغ، وبلغ وصاحبكم لسّه والله ما بلغ!.
- وبصراحة خايف صورة رمضان صبحي لاعب الاهلي مع خطيبته اللي نشرها على "إنستجرام " تنسيك إن عصمت صادق بطل العالم في كمال الأجسام مات ومحدش حس بيه، وعمصت صادق حدوتة مصرية، رفع اسم البلد كتيييييييييييييير، وآخر بطولة شارك فيها وعمره 60 سنة وده كان سنة 2011 وأخد الميدالية الذهبية في البطولة دي، تخيّلوا واحنا مركزين مع رمضان وخطيبته، وسايبين راجل عظيم بالحجم ده طب ع الأقل ادعوا له: "الله يرحمه عصمت.. مش رمضان !".
- ولجماهير الكورة فيه النهاردة "قمتين"، الأولى الساعة خمسة بين الأهلي والإسماعيلي، والحقيقة إنك هتشوف ماتش "مملل" جدًا، مش هيكون فيه كورة لا ده عايز يخسر ولا ده عايز يخسر، الماتش التاني الساعة 8 وهيكون نااار بين الزمالك والمصري، وإحساسي بيقولي إن "الزمالك" هيزعل البورسعيدية.. بس كده.
- طب وعشان كله ميبقاش ضرب.. ضرب.. ضرب قول: "" يا حبيبي ونبض قلبي ونور حياته، يا ابتسام ليلي وخياله وذكرياته، هديت الدنيا هنا واتلهفت لك، كلها معايا هنا اتلفتت لك، الربيع، الورد، النبع اللي جاري، النسيم الحلو، الليل اللي ساري، كلهم ويايا أهم مستنيين، كلهم يا حياتي لك متشوقين".