ما تقولش سمسارة.. قول: «بيزنس وومان»

فتيات يعملن فى سوق العقارات
تظل مهنة السمسار مرتبطة فى أذهان الجميع بكونها مهنة للرجال فقط، لكن الوضع تغير كثيراً مع إقبال بعض الفتيات للعمل فى هذا المجال.
«انتى هتشتغلى سمسار بس ببدلة، سمسار محترم شوية»، أول ما سمعته هاجر الرشيدى، التى تعمل فى سوق العقارات منذ خمس سنوات، مجال وجدت به ضالتها فى العمل، وبناء اسم وسمعة طيبة بين أناس لا تعرفهم، قررت خوض التجربة.
بدأت الفتاة ذات ال28 عاماً من القاهرة الجديدة، وظلت بها فترة حتى انتقلت للعمل فى مدينة 6 أكتوبر، «بس مارتحتش فى 6 أكتوبر خالص، القاهرة الجديدة كل الناس عارفة بعض، وممكن أكلم حارس يظبطلى شقة أو أتفق مع زمايلى على العمولة، السوق مش مفتوح قوى زى 6 أكتوبر»، تختلف الشركات التى تعمل لديها هاجر، من شركات تسويق للعقارات فقط إلى شركات بيع وشراء وتسويق، «فيه فرق بين العقارات والعربيات، أنا مش ببيع وباخد عمولة أى كلام، لا أنا ببيع شقق بملايين وليَّا عمولتى»، تستنكر الفتاة نقد الناس لتلك المهنة، خاصة إذا عملت بها فتاة، فهى تراها أقرب للبيزنس من السمسرة، تتعدد مهام هاجر بين إقناع العميل عن طريق التليفون إلى الصرف على إعلانات خارجية، وعلى مواقع عقارية، وبانرات فى الشوارع، والنزول إلى موقع العقار مع سيارة الشركة والعميل، «متعة إنك تكسبى الزبون اللى قدامك وتخليه يشترى»، تلعب هاجر فى عالم البيع والشراء على استراتيجيتين، أولاهما أن الزبون عبارة عن شنطة فلوس متحركة، فإذا حان الوقت يجب كسب تلك الحقيبة، والأخرى تعتمد على أن الزبون فى حاجة للشراء فتقدم هاجر ما لديها وتنتظره ليأتى لها بالبيعة، «أهم حاجة مكونش ملتوية، واعمل خطط تضمنلى إنه هيشترى منى، فيه زباين بتفضل تتفاوض معانا بالشهور، ويغيروا خططهم كذا مرة، والسعر وهكذا الشطارة إنى أفضل معاه للآخر».
«كل ما بشتغل كل ما بلاقى حاجات جديدة، وإنه بيزنس بحره واسع قوى، ولسه شوية»، رغم الخبرة التى اكتسبتها ورغبتها فى تكوين شركة لحسابها الخاص، تجد الفتاة أنها تحتاج لبعض الوقت، «أصل التعب فى المجال ده من نوع مختلف، مش مجهود بدنى بس، ده ذهنى، ومش سهل الشغل فى سوق بالمواصفات دى، على قد الفلوس اللى ممكن تيجى من ورا الشغلانة على قد المخاطر اللى هتتحط فيها». رغم خبرتها الصغيرة فى مجال السمسرة والعقارات، فإن سارة شوقى استطاعت أن تعرف ما يريده العميل منها عند بيع عقار فى مكان ما، «عايز مقدم قليل وسعر قليل وأقل قسط ومكان تحفة طيب إزاى»، الصدق والأمانة هما الطريق الذى رسمته سارة لنفسها فى هذا المجال، وذلك لأن العميل فى الغالب أصبح لا يملك ثقة فى شركات التسويق العقارى، «محتاجة أصل دى شقة العمر، ومش استثمار والعميل بيدفع فيها كل فلوسه فعايزها تكون أحسن حاجة». ترى سارة كذلك أن المجال متعب للغاية، ويحتاج إلى صبر وإمكانيات واسعة كى تستطيع التكملة به، «لازم أوضح الصورة كاملة طول الوقت، ومميزات وعيوب العقار، ولازم أنا نفسى أكون مركزة»، وفق سارة، التى تضع العميل على أولوياتها، قبل عملية البيع والشراء وعمولتها الشخصية، فدورها يقتصر على تخليص عمليات البيع والشراء تليفونياً، «الشركة مش بتنزل غير الشباب للمواقع، البنات يشتغلوا جوه الشركة»، وتستنكر سارة هذا التمييز، ولا مانع لديها فى المعاينة مع العملاء بالخارج، «هروح بعربية الشركة وهيبقى معايا زمايلى مش هروح مع عميل لوحدى، هخاف من إيه؟». ميرنا مصطفى، 23 عاماً، كل خبرتها فى المجال العملى هو السمسرة وبيزنس العقارات، ثلاث سنوات عمرها فيه، إلا أنها كفتاة واجهت كثيراً من المواقف التى جعلت رأيها، «أنا لو عليَّا البنت متشتغلش ولا تتمرمط وتفضل قاعدة فى البيت»، حيث كُسرت قدم الفتاة العشرينية ذات مرة بينما خرجت مع عميل فى موقع العقار ولم تشاهد الحفرة التى وقعت بها، «معندناش تأمين طبعاً، رجلى اتجبست شهر، وقعدت فى البيت، بس قبضت مرتبى كامل الحمدلله».
«للأسف معظم الناس فى البلد دى مش بيحبوا المجال ده، انتى بتقابلى عمال كتير، ورجالة وطالعة نازلة»، طوعاً أو جبراً تكمل ميرنا عملها فى هدوء، حيث لا تعرف مجالاً آخر تعمل به، «أول ما اتخرجت اشتغلت فى المجال ده، ومفيش حاجة تانية اشتغلتها»، «مرمطة»، على الرغم من «فلوسه الكتيرة»، فإنه يستنزف الصحة بوجه عام، «كل اللى بيشتغلوا فى المجال ده عندهم الضغط وبيشربوا سجاير، وفعلاً ممكن يجيلك فلوس من الهوا».
للعاملين فى المجال بوجه عام متاعبهم وللفتاة بوجه خاص مصاعب أخرى، فالبنت حينما تعمل فى مهنة ما عليها إثبات كفاءتها فى العمل، بالإضافة إلى إبعاد النفوس المريضة عنها، والمحافظة على السمعة الطيبة، «مرة كنت مع راجل عنده 60 سنة بتفرج على الشاليه بتاعه وبصوره عشان أبيعه، قالى تعالى قضى الويك إيند معايا وخدى كذا وكذا ونبقى صحاب، بس أنا صديته ومردتش عليه»، هذا ليس الموقف الوحيد الذى تعرضت له الفتاة العشرينية من سخافات العملاء، فحسب مزاج المتصل بالشركة إذا كانت تقوم بالبيع تليفونياً، تجد المعاملة، «مرة واحد سب، وأنا مينفعش أرد، وغيره يتعامل كويس، على حسب مزاجهم».
بالإضافة إلى مشاكل العملاء خارجياً تجد ميرنا تمييزاً للذكور داخلياً فى بعض الشركات، حسب ما تنقلت بينها على مدار ثلاث سنوات، «بيميزوا الولد، وبيضحكوا على البنات ويقللوا العمولة بتاعتنا، الشركات مش ماشية بقوانين العمل أصلاً»، ولا تجد ميرنا ميزة فى الشركات سوى الإعلانات والانتشار، وتنتظر فرصة لتكون حرة وتعمل لحسابها، وهى الخطوة التى بدأت فى تنفيذها بالفعل بعد كم المضايقات التى تعرضت له طوال عملها، «الشركة بتستنزف العربية بتاعتى، ومجهودى، وبعد كده ما آخدش العمولة كاملة، 50% منها، أو راتب ثابت زائد 25% منها، وساعات لو مابعتش مش بقبض خالص».
تخرجت آلاء محمد من جامعة 6 أكتوبر، من كلية العلوم السياسية، وكالمعتاد فى مصر لا يعمل أى شخص بشهادته وإنما فى مجال آخر، فهدت الصدفة آلاء إلى مجال العقارات، وعملت به ونجحت طوال ثلاث سنوات، «هو مجال حلو بس مش حاجة واو، نفسى أشتغل بشهادتى وأكون سفيرة»، تنقلت آلاء بين عدة شركات، بعضها كان استغلالياً، والآخر لا يقدر عمل الفتيات، «كان ممكن أنزل مع زميلى نفرج ناس على شقق، ومش باين إنها عربية شغل، ودى حاجة محرجة ليَّا ولأهلى إنى نازلة مع مجموعة شباب».
منذ كان عمرها 21 سنة وهى تحاول بناء سمعة طيبة لها فى هذا المجال، «أنزل لوكيشنز، وأفرج العملا، وممكن ألف وأدور وأتفق مع حارس العقار وفى الآخر البيعة تبوظ عادى جداً»، ثم امتنعت عن النزول للمواقع واكتفت بالمكوث خلف المكتب الخشبى تتابع سير عمليات بيع وشراء العقارات تليفونياً، فيه شركة تحافظ على الفتيات من النزول للشارع، «بس الأوحش فى التليفونات قلة الذوق، وبعدين يتفق معايا العميل على كوميشن وبعدين يرجع فى كلامه وهكذا». بعد فترة من العمل فى هذا المجال استبدلت آلاء السيارة العادية بأخرى تحمل اسم الشركة التى تعمل لديها، وطوعت الظروف من حولها وعملت ما ترغب به فى هذا المجال، فتجولت فى مواقع العقارات بصحبة الفتيات بدلاً من الشباب، «وعرفت إزاى من قعدتى فى البيت أعمل فلوس من الهوا، وإزاى ممكن يطلع عينى بره وألف وبعدين واحد قليل الذوق ياخد منى العميل، البنت فى المجال ده مش بونبوناية، لا بتسحل عادى جداً»، العمل فى مجال العقارات ليس سهلاً، فهو وفق آلاء يحتاج دوماً لمجهود ذهنى وعصبى، «بنزل وامشى فى الرمل واتفق على نسبتى والراجل يقلله»، وعليهن كذلك تحمل العملاء ومطالبهم الكثيرة، «لو العميل بييجى الشركة ويخلص كل حاجة يمكن منتعبش، بس أنا مطالبة إنى أخلى ده يرضى عن سعر عميل تانى، وأفض خناقة على التكييف، وصداع التليفونات من العملا كل شوية، وبعد ده كله أقنعهم إن المفروض ليَّا عمولة مناسبة»، لذا يصبح أمل آلاء الأخير هو العمل لحسابها الشخصى، بعيداً عن متطلبات الشركات، «لسه خبرتى مش كبيرة، بس أن باسعى يكون ليَّا شغلى الخاص».
«البنت ممكن تتعب من الشغلانة دى»، وفق علاء السيد، أحد أصحاب مكاتب التسويق العقارية، الذى عمل فى تلك المهنة لسنوات، ويرى أن الفتيات دخيلات عليها، ويؤرخ فترة دخولهن منذ ثورة ال25 من يناير، التى يراها «ثورة عقارية» أيضاً لما شهدته من مخالفات صارخة وتعدٍ على أصول المهنة، ولكنه يرى أن عمل الفتيات فيه «مش عيب، طالما بتنزل وتطلع مع حد من المكتب، مش بتروح تفرج العميل الشقة لوحدها»، وعلى الرغم من ذلك لا يفضل علاء أن تعمل لديه فتيات فى مكتبه، لأن الرجال يستطيعون القيام بتلك المهام بشكل أكبر. من أسوان جاءت «أم مروة» مع زوجها بحثاً عن ظروف معيشية أفضل، ولأن فى يد زوجها صنعة السمسرة قررت أن تساعده فيها، فتفوقت على نفسها، ودخلت بيزنس العقارات وبدأت بتأسيس سمعة طيبة لها فى السوق، «ألف من يعرفنى وتهمنى الخدمة الكويسة للناس، والفلوس تيجى بعدين»، لم تكتف ابنة أسوان بطبيعة عمل واحدة، بل هى حنانة أيضاً وكوافيرة، وصاحبة مكتب توظيف عمالة، نجاحها وسمعتها الطيبة بين الناس أهلتها لتكون هى القبلة لديهم، «أى حد عايز مساعدة بساعده، عشان معارفى كتير بسبب طبيعة عملى».