بجة: «المهرجانات» فن محترم أفسده الصغار.. وحولنا أغانى «منير» شعبي

طاولة فى أحد الأفراح الشعبية تحمل زجاجات من الخمور والبيرة، ورائحة الحشيش تفوح من أفواه المدعوين، راقصة ترتدى بدلة رقص شعبية، و«نبطشى» يردد بعض التحيات للحاضرين لجمع النقطة، ومطرب يغنى بعض الكلمات على موسيقى المهرجانات.. هكذا رسخ فن المهرجانات فى أذهاننا، الأمر الذى أثار استياء مؤسسى فن المهرجانات، فحاولوا توضيح فنهم من خلال حوار أحد المؤسسين، عمرو بجة، مطرب فريق «فيجو»، يشرح ل«صحبة» تفاصيل اختيارهم للكلمات والموسيقى ومحاولتهم للبُعد عن الرخص والرداءة فى سبيل تطوير فن المهرجانات وتوصيله لجميع فئات المجتمع.
■ عرفونا بالفريق؟
- الفريق بدأ من 2007 بناس مختلفة زى عمرو حاحا والسادات وأحمد فيجو اللى بيعتبر مؤسس فن المهرجان فى مصر.
■ من هم أعضاء الفريق حالياً؟
- أحمد فيجو كموزع موسيقى استمر فى الفريق وضم أشخاصاً جدداً، وأصبح الفريق مكوناً من 5 أشخاص، زى: «عمرو بجه، مطرب (27 سنة)، ومؤلف الأغانى أحمد حبيب، 26 سنة، وناس تانية زى نموسة ومدنى، كلنا من منطقة السلام، وخريجين معاهد».
■ ما هدف الفريق من غناء المهرجانات؟
- المهرجان فن، مزيكا نجحت وانتشرت مؤخراً، كل الناس خاصة الأطفال بتحب تسمعها، ولأنه نوع مزيكا بيبسط الناس وبيبسطنا، فهدفنا هو إسعاد الجمهور ومناقشة قضايا تخصه.
■ يعنى إيه مهرجان؟
- المهرجان مزيكا إلكترونية، تستخدم لتنشيط الجسم وتحريكه، وداخل فيها بعض الآلات غير الحيّه بخلاف الأورج والبيانو وغيره، وبرامج تحديث الصوت، والدرامز والسكسكة، بتوزيع كلمات ومزيكا مختلفة.
■ متى نشأ المهرجان؟
- المهرجان اتولد من الأفراح الشعبى، لما كُنا بنلاقى عدد شباب كبير بيعمل دوشة وبيولع ألعاب نارية وبيرقص على أى نوع مزيكا، وفجأة الفرح يقلب مهرجان، علشان كده أطلقنا على النوع ده مهرجان.
■ هل ينفع أى أغنية تتعمل مهرجان؟
- طبعاً، كل الأغانى نقدر نحولها لمهرجان، أغانى محمد منير بالأخص بتبقى حلوة فى المهرجانات، كل الفكرة إننا بنغير فى طريقة المزيكا وبندخلها محدثات صوت، وبنغير فى توزيع الكلمات وطريقة نطقها.
■ الفريق بأعضائه الجدد عملوا كام أغنية؟
- عملنا حوالى 6 أو 7 أغنيات.
■ إيه أشهر أغانيكم؟
- أغنية «كسرة نفس»، وأغنية «شايف نفسه» اللى غنيناها مع الطفل سيف الله مجدى، اللى عمل أغنية «ابن الشهيد».
■ هل شاركتم فى عمل مهرجانات للأفلام؟
- مؤسس الفريق أحمد فيجو، بالتعاون معانا، عملنا مزيكا المهرجانات بتاعة فيلم نظرية عمتى، والألمانى، أغنية «حارتنا حارة عجيبة» الشهيرة، وفيلم جيم أوفر، ومسلسل مزاج الخير فى رمضان.
■ ما القضايا التى تناقشونها فى المهرجانات؟
- قضايا الأخلاق بشكل عام، العادات السيئة اللى مش من تقاليد مجتمعنا، زى سهر البنات بره لوقت متأخر وقبول الأهل لده، وأغانى عن الوطن، وعن العلاقات الإنسانية وعدم وفاء الأصدقاء، وعن المخدرات وانتشارها فى المجتمع.
■ لماذا ترتبط المهرجانات بالحشيش والخمور؟
- نسبة المخدرات عالية جداً فى المجتمع وإحنا بننقل واقع منتشر لكنه مش صح، وطبعاً المهرجانات غير مرتبطة بالحشيش، لكن لو فيه فرح الواحد بيكون شارب ومبسوط وبيسمع مهرجان.
■ مين الفئات اللى بتسمعكم؟
- الفئات اللى بتسمعنا معظمها من الشارع، من المناطق الشعبية.
■ مش بتحاولوا توصلوا لكل الفئات؟
- فيه ناس مش بتفهم المهرجانات، لكن المهرجان فن، وفن ناجح ومؤثر جداً كمان، إحنا بنوصل دلوقتى، عملنا حفلة فى الجامعة الأمريكية شهر خمسة الماضى، والناس اتفاعلت معانا وحبت اللى قدمناه، والناس دفعت فلوس علشان تسمعنا، ما أعتقدش إننا كده مش واصلين لفئات المجتمع العالية.
■ ما موقف نقابة الفنانين من المهرجانات؟
- النقابة اعترفت بينا، وطلعت كارنيهات كتير لفنانين المهرجانات.
اعترفت بهم النقابات الموسيقية.. ويرفضون ربط أغانيهم بالحشيش والخمور والكلمات الرخيصة
■ إيه رأيكم فى الكلمات اللى بتتكتب فى المهرجانات؟
- اللى بيكتب الكلمات غير المحترمة دى بيبقى شباب صغير، عايز يقلد مشاهير المهرجانات وبيسعى للشهرة بأى طريقة، فالناتج بيكون بيكتبوا أى كلمات، أو بيختاروا الكلمات الرخيصة علشان عارفين إن الناس هتجرى عليها، واللى مقدم الجمهور بيسمعه.
■ ماذا تفعلون للتطوير من أعمالكم؟
- إحنا بنغنى لون قريب من المجتمع، مش قضايا مصيرية يعنى، وبنحاول نطور فى كلامنا، ننقى كلمات تؤثر، بنطور من أدائنا علشان الناس تنتظر اللى هنقوله بعد كده، وبنحاول نطلع إيفيهات تنتشر فى المجتمع.
■ ما مدى تأثير هذه الكلمات على الأطفال؟
- الطفل بيطلع ملوش علاقة برأى أهله أو كبار منطقته بشكل عام، الطفل بينقى الأغانى بالمزيكا والكلمات اللى تعجبه، فبتلاقى أطفال 10 سنين ماسكين التليفون وحافظين المهرجانات، علشان كده بنحاول نراعى ربنا فى الكلمات اللى بتوصل لهم.
■ رأيكم فى تقليد الناس للمهرجانات؟
- شباب العشرينات متعتهم المهرجان لأن لو إحنا بنغنى فى فرح ودخل علينا شلة شباب بنحييهم تحية خاصة بالاسم، ودى شهرة الشباب بيحبها.
■ بنسبة كام المهرجان مؤثر فى الشارع؟
- الناس بتقلد الناجح والمختلف، لذلك المهرجانات مؤثرة فى الشارع بنسبة 90%، والدليل على ذلك إن فيه فنانين مشاهير كتير مابقوش يتسمعوا بسبب المهرجان.
■ رسالة لشباب المهرجانات الجدد؟
- اختاروا كلمات كويسة، وارجعوا للناس اللى عندها خبرة فى المجال، واتعلموا البرامج الإلكترونية اللى هتساعدكم على صنع المهرجان.
■ رسالة لجمهور المهرجانات؟
- اسمعوا المهرجان، بيجيب حالة انبساط حلوة، لما تكون راكب العربية ومش عايز تشيل الهم، هتسمع الحقيقة فى المهرجان وترتاح.
■ ما أعمالكم المقبلة؟
- فيه ألبوم قريب من إنتاج الفريق، لسّه مش متفقين على الاسم، اللى شغال فيه كل الفريق بالإضافة لفريق «عصابة».