الزواج قرار هناخده هناخده

الزواج شىء مصيرى ومهم خصوصاً لأنه قرار هناخده هناخده بمزاجنا أو غصب عننا، فالبعض يطلق عليه (شر لا بد منه)، أنا شخصياً باعترض على موضوع «لا بد منه» لأننى أكره فكرة أن أكون مجبراً على شىء أياً كان، طبعاً دى وجهة نظرى الشخصية، يمكن عشان لسه ماتجوزتش؟
الله أعلم.
كثيراً ما أقابل شباباً من مثل سنى أو أصغر ونبدأ فى الحديث عن الحياة الشخصية لكل منا، مشاكل الحياة اليومية، متاعب الشغل والخطط المستقبلية فى حياتنا، وكل ما نوصل عند موضوع الخطط المستقبلية اتفاجأ برد ظريف جداً وهو «أنا قررت أتجوز». ووقتها أنظر إليه مبتسماً وأقول له «مبروك.. ويا ترى مين العروسة؟»، فيكون رده سريعاً «لا لا لا، لسه مفيش عروسة». أمّال إنت هتتجوز نفسك ولا ده قرار احتياطى عشان أول ما تلاقى واحدة مناسبة متفكرش ولا إيه؟، فيحاول وقتها أن يقنعنى بأن أهم شىء فى الزواج هو الإقبال على الخطوة واتخاذ القرار.
طيب هو إنت الجواز بالنسبالك إيه؟، فيفاجئنى مرة أخرى بوجهة نظره عن الزواج والتى تتلخص فى واحدة حلوة وكويسة وبنت ناس. ده على أساس أن فيه بنات بتبقى بنات كائنات فضائية مثلاً؟ هى دى المواصفات؟ طب إنت عايز تتجوز ليه طيب؟، زهقت من بيتنا ومن التنطيط والصحوبية؛ عايز أستقر ويبقالى بيتى. زهقت؟ يا ابن الإيييه؟ عايز تتجوز عشان زهقت؟ زهقت وانت حر ولوحدك وصاحب قرارك وأقصى التزاماتك هى نفسك؟ طيب مفكرتش بعد الجواز الحياة هيبقى شكلها إيه؟. لا، طبعاً فكرت أنا أول ما هاتجوز هخلف على طول عشان تتشغل مع العيال وأبقى أنا حر بقى.
حر؟ هاهاهاهاهاهاها، دانتَ هاتبقى حر حرية، خصوصاً من ساعة الخلفة والبامبرز لحد أول يوم فى الحضانة والمدارس والجامعة، بجد برافو عليك، زهقان فقررت تتجوز، فكرت هتسكن فين؟ هتشترى شقة بكام؟ بلاش يا عم، فكرت فى المهر؟ هتدفع كام؟ ولو قررت إنك تخلف على طول كمان عشان تلهيها بالعيال وتبقى انت حر بقى، طب ما انت حر من الأول ليه اللفة السودة دى؟
لا شك أن الجواز مهم لكن الجواز اللى نصدقه مش الجواز وخلاص، يقول سبحانه وتعالى فى كتابه الكريم {وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِى ذَٰلِكَ لَآيَاتٍ لِّقَوْمٍ يَتَفَكَّرُونَ} (الروم: 21).
يمكن من خوف الأهل على البنت بقت طلباتهم مبالغ فيها! متخيلين إن بالطلبات دى بيأمّنوا مستقبلها مثلاً؟ لكن الغريب إن الطلبات دى وأكتر منها لو البنت اتطلقت هيحصل إيه؟ هتنفعها الفلوس؟ هتبيع الشبكة وترجع زى ما كانت من غير وجع وكأن شيئاً لم يكن؟ ولّا هتفضل مهمومة وحزينة؟
رسالة منى إلى جميع الأهالى: الجواز مش مشروع نؤمّن بيه ولادنا بفلوس وخلاص.. الجواز رحلة، المفروض إنها طويلة بين اتنين، لو اشترينا سعادتهم وفرحهم هيكونوا هما نفسهم أمان بعض فى الدنيا، الحب اللى بجد عمره أطول من الفلوس.
المشكلة دلوقتى إنى بعد ما كتبت الكلام ده كله، موضوع الجواز بدأ يزن فى دماغى.
ربنا يستر.