بعد تداول إجابات الامتحان..نشطاء:"يا واحشني اديني رنة تخلي اللجنة جنة"

دشن نشطاء موقع التواصل الاجتماعي "تويتر"، هاشتاجا بعنوان "غشاشون فدائيون"، عقب تداول إجابات امتحانات الثانوية العامة عبر موقعي التواصل الاجتماعي "فيسبوك" و"تويتر"، بعد دقائق قليلة من بدء اللجان، وشارك النشطاء بالعديد من التعليقات الرافضة لمبدأ الغش، الذي يضيع مجهود الطلبة.
كتب أحمد: "انت لو وفرت مجهودك وجبت 50% هتخش الشرطة، كلية محترمة منصب ورتبة وفلوس كتير"، بينما كتب محمود: "أنا عايزك تغش في الفيزياء وتجيب مجموع وتخش هندسة عين شمس، وابقى قابلني لو عرفت تحل حاجة، صدقني الدكاترة هيحبوك أوي".
ورفض جلال مبدأ الغش قائلا: "سرب امتحان وضيع مجهود شهور، اظلم طالب مجتهد، وخرج مهندس يسرق حديد ودكتور ينسى مشرط في بطن مريض، ومحاسب مختلس خرج جيل غشاش".
بينما كتب عمرو: "يا جماعة من الآخر عشان الناس اللي بتهري في موضوع الغش، احنا معندناش نظام تعليم، لا اللي بينجح بمجهوده متعلم ولا اللي بيغش متعلم".
وعلق أحمد ساخرا : "يا واحشني اديني رنه هتخلي اللجنة جنة"، بينما كتب كريم: "النص درجة بتفرق في الثانوية العامة، يعني مستقبلك كله يتغير عليها، بس لو جبتها من حرام اعرف ان ربنا مش هيباركلك في حياتك".