م الآخر| ماتخلفوش "رؤية من الواقع"

- لو بتحبوا MBC2 اكتر من MBC3.. ماتخلفوش
- لو مابتعرفوش تناموا لو حد حاطت صباعه ف ودانكم و رجله ف بؤكم.. ماتخلفوش
-لو رجليكم حساسة و هتقعدوا تصوتوا لمجرد انكم دوستوا على حِتة ميكانو حديد طولها 5 سم مُسننة و مُدببة الأطراف.. ماتخلفوش
-لو ما بتعرفوش تاكلوا و حد قاعد على حجركم و شعره ف عينكم و راسه زي بندول الساعة رايح جاي.. ماتخلفوش
-لو ماتعرفوش تتكلموا فى التليفون و حد حاطط ايده ف بؤكم بيحاول يمسك لسانكم بمنتهى الإصرار و التركيز.. ماتخلفوش
-لو ما بتعرفوش تكيفوا اهتماماتكم التليفزيونية من توم و جيري لغاية WWE مرورا ب Ben10 و Spong Bob.. ماتخلفوش
-لو مُصرّ/ة تدخلوا الحمام لوحدكم او فاكرين ان ليكم اى خصوصية فى اى مكان ف بيتكم.. ماتخلفوش
-لو مابتعرفوش تجاوبوا 50 مرة على نفس السؤال ب50 طريقة مُختلفة و مُقنعة.. ماتخلفوش
- انا ليه عندي خرمين ف مناخيري!؟ من الأسئلة الوجودية المهمة ..لو ماعندكوش ليها اجابات مُقنعة و سريعة.. ماتخلفوش
-لو هتاخدها بحساسية لما تلاقي تفاصيل حياتكم عند الجيران و اهاليكم و اصحابهم ف الشارع و المدرسين و البقال.. ماتخلفوش
-لو ما بتعرفوش تحفظوا اسامي الأبطال الخارقون و اصحاب ستروبري شورت كيك والعربيات و اسامي لعيبة الFIFA.. ماتخلفوش
-لو بتضايقوا من نقرة الشمس او مش بتستمتعوا بالقعاد مع اهالي الاولاد اللُطاف وانتو مستنينهم ف التمارين.. ماتخلفوش
-لو عندكوا اي نوع من الطفرات الجينية بتوع X-Men و خصوصا ولفرين او ستورم او بيست ...لو متعاطفين مع hulk.. ماتخلفوش
-لو كرامتكم هتنقح عليكم لما مدرس يهزقكوا بالأدب لإن ابنكم مهمل او فاشل او بيعمل صواريخ و يرميها عليه و هو بيشرح.. ماتخلفوش
-لو فاكر ان التربية اكل و شرب و مصروف و احدث بلايستيشن و آيباد و بس..و هتعتبر انك بكدة زالفل و اديت دورك.. ماتخلفوش
-لو مش عارفين انها مسئولية مشتركة بين الطرفين ...هى بتأسس و بتحتضن و هو بينمي و بيطور ..لكل واحد دوره.. ماتخلفوش
-لو ماعندكوش استعداد تغيروا من عادات غلط انتوا بتعملوها و متعودين عليها علشان ولادكم يتعلموا الصح .. ماتخلفوش
-لو فاكر انهم ييتعلموا بالأوامر و التوجيهات و مش عارف انهم مونيتور بيرصُد و بيخزن كل اللى بيشوفوه مش اللى بيتقالهم ..لو مش هتربوا نفسكوا الأول.. ماتخلقوش
-لو مش هتحترموا عقلية و ذكاء طفلك و تفتكروا انكم علشان اكبر ف بالضرورة انصح و هتتعاملوا معاه انه عيل ما بيفهمش حاجة و انكم عارفين مصلحته دون مراعاه رغباته و ارائه.. ماتخلفوش
-لو مش فاهمين ان لكل طفل طريقته و اسلوبه اللى بيعبر بيه عن رغباته و مشاعره و مش بالضرورة تعجبكم بس لازم تستوعبوها..لو هتكبتوهم و تخنقوهم و تمشوهم على عجين ما يلخبطهوش.. ماتخلفوش
-لو هتقعدوا تقارنوهم ببنت بنت خالتك و بنت اخت عمة باباك انهم اشطر و طلعوا اوائل الجمهورية و جابوا ميدالية دهب و مش هتحترموا قدراتهم و اختلافاتهم الفردية.. ماتخلفوش
–لو هتفضلوا تضغطوا عليهم يطلعوا الأوائل و يحققوا مراكز و يتعلموا جيتار و يرقصوا باليه و يرسموا لوحات سريالية تكعيبة تأثيرية و يلونوا جوة الخط و يمشوا ع الحبل ف نفس ذات الوقت ..و داخلينها تحدي يانتوا يا هما.. ماتخلفوش
-لو مابتعرفوش تسيطروا على اعصابكم و بتُستفزوا بسرعة و بتنسوا مين فيكم الكبير اللى المفروض يحتوى الموقف و يحتضن التاني.. ماتخلفوش
-لو فاكرين انكم هتربوهم زى ما انتوا اتربيتوا و مش واخدين بالكم انه كان اخركم اخترنا لك و لا كان فيه قناة توك توك و لا بتسمعوا مهرجانات،لو ما عرفتوش تواكبوا التغيير و تنزلوا لمستواهم و تفهموهم.. ماتخلفوش
-لو مش مستعدين لفترة المراهقة و اسئلتها و تطوراتها المرعبة و هتفضلوا معلقين لولادكم الجناحات و فاكرينهم ملايكة.. ماتخلفوش
-لو مش متخيلين انكم عادي ممكن تلغوا سفرية علشان حد فيهم تعب او تبقى خروجتكم الملاهي علشان نفسهم يروحوها.. ماتخلفوش
-لو هتتعاملوا معاهم دايما على انهم حِمل تقيل على قلوبكم ..و هتحاولوا تتملصوا منه و ترموه على اي حد علشان تعيشوا حياتكم.. ماتخلفوش
-لو مش هتعرفوا تكيفوا روتين حياتكم على مواعيد التمارين و الدروس و وقت الإمتحانات و زيارات اصحابهم ف البيت.. ماتخلفوش
-لو مش هيبقى امتع لحظات حياتكم هى اللى بتقضوها معاهم ..تلعبوا ..تحكوا حكايات...تضحكوا ...ترقصوا ...تغنوا.. ماتخلفوش
-لو مش عارفين ان دة استثماركم الحقيقى فى الدنيا و دة اللى هيبقالكم بعد ما هتسيبوها ..يا هيفضلوا يترحموا عليكم و يقول ربنا يرحمهم زي ما ربوني ..او ربنا يسامحهم قصروا ف تربيتي .. لو مش مقدرين حجم المسئولية و قُدسيتها و مش قدها.. ماتخلفوش
- ولادك مش بس علشان يشيلوا اسمك او للحفاظ ع النوع .. ولادك مش علشان ترضي اهلك و تجيبلهم لعبة يلعبوا بيها ... ولادك مش علشان يتقالك بابا او ماما ..و فلان مش احسن منك خلف 3 زى القمر ولادك مسئولية ... هتتسئل عليها قدام ربنا ... نبتتك اللى بتزرعها و بتنميها ...يا طرح طيب يا طرح خبيث ... التربية متعبة ...بس ممتعة.. ثمرة جهدك و تعبك و عرقك اللى بتشوفها بتكبر قدام عينك استثمرها ...نميها .. حاجي عليها ...استمتع بكل لحظة معاها .
اعرف انك هتسهر ..هتتعب ...هتتألم ...هتركز ...هتتغير ..هتبكي..بس ف الآخر هتفرح وهتبصلهم فى آخر المشوار و هما ناجحين و محبوبين بفخر وتقول "دول تربيتي".. "دول اولادي".