إنستاهاپى

مخنوق؟ عادى، اعمل نفسك مبسوط.. سيبته؟ عادى برضو اعمل نفسك ناسى و«قرر» تحب غيره.. بعد كده هتلاقى نفسك قاعد فى كافيه وبتحب جديد بقى ومسيطر فهيعدى جنبك شخص حاطط نفس بارفان حبيبك اللى انت بتقول إنك نسيته، ساعتها قلبك هيوجعك.. عادى مايهمكش، كمّل واعمل نفسك ماخدتش بالك.. أو أقولك، طلّع موبايلك واكتب ستاتس قول فيها إنك مبسوط أوى و«إيموشنز» بتضحك كتير.. حاسس إنك هتبكى؟.. عادى، خد بق ميه وخبّى دموعك ورا النضارة الشمس، ولو الدنيا بالليل خبيها ورا ضحكة عالية. لو دموعك غلبتك وفرضت وجودها عليك مايهمكش، ممكن تقول إن فيه تراب دخل فى عينك، بس المشكلة إنك وانت بتقولها هتلاقى صوتك مرعوش من كتمته للعياط.. بس محلولة، قولهم إنك داخلك برد!.. لو ماصدقوش هرّج أكتر وطلّع موبايلك عشان تاخد «سيلفى» معاهم وطلّع لسانك وانت بتتصوّر أو اعمل ال«V» ساين ونزّلها عالإنستجرام وهاشتاجك بقى instahappy #instafun#.. لو لسه مخنوق سافر «السخنة» واركب التليفريك. رحت السخنة وقاعد وسط ناس كتير بس لسه قرفان.. صح؟ عادى، اضحك بصوت عالى على قد ما تقدر عشان تغطى على صوت بكا نفسك اللى انت حابسها جواك.. يللا اضحك.
خلصت يومك؟ روّحت؟ يللا بقى غيّر هدومك واقلع جزمتك واقلع معاها ضحكتك.. سيب وشك ياخد ملامحه اللى اختارها.. سيب دموعك تمشى فى طريقها.. ولو حد كلمك كح كحتين ورد ب«إيييييه يا حبى» يللا قفلت معاه؟ خلاص بقيت لوحدك، أظن من حقك بقى تخلى سبيل نفسك شوية.. يللا، امسك موبايلك، شوف اللى واحشك هو «لاست سيين» إمتى.. افتح البروفايل بتاعه عالفيس بوك، شوف صوره الجديدة، احتمال يكون سايبها «پابلك».. غمّض عينك وحاول تشوفه.. جالك مسدچ من صاحبك؟ رد ب«هههههه.. قشطة جداً» و«LOL» كتير.. اقفل معاه وارجع لنفسك.. استمتع بحزنك، كلها كام ساعة والصبح ييجى وهتلبس وش الفرحان وهترجع تقيد دموعك فى زنزانة الضحكة العالية.. مش انت كده برضو؟
انت بتضحك بس قدام الناس؟ بتخرج عشان الناس تقول انك مبسوط؟ لما شريط جديد بينزل بتدوّر على أكتر أغنية حزينة فيه، صح؟ وقدام الناس لما الأغنية دية بتشتغل بتقول لهم: «يااه عالكآبة!».. دايماً الفيس بوك بتاعك والواتس أب بيمشوك فى طريق إجبارى ليه؟.. انت حاسس بوحدة رهيبة وسط الصحاب الكتير؟ بتبص فى ساعتك كتير وانت فى خروجتك معاهم عشان بتبقى عايز تروّح.. بتلاقى راحتك فى وحدتك لإنك ساعتها بس بتعرف تواجه نفسك بإنك مش مبسوط، صح؟
للأسف، كتير أوى مننا عايش مسجون فى زنزانة الحزن الانفرادى.. كتير مننا مقيد مشاعره.. كتير مننا بيقول «أنا تمام» وهو بيبقى بيموت من جواه.. كتير مننا بيضحك ويهزر بس بصوت مهزوز، صوت اتخنق واحتج من الضحك، صوت تعب، ولما قرر يخلى سبيل الحزن اللى جواه.. قراره اتمنع. كلنا ماشيين ندوّر فى الحياة على أقصى درجات السعادة.. بس للأسف، نسينا نريح نفسنا الأول عشان لما السعادة تيجى نقدر نستقبلها ونحس بيها.. نسينا نفضّى عنينا من الدموع اللى فيها عشان نعرف نشوف السعادة.. نسينا نبطل الضحكة الخايبة عشان لما الضحكة اللى بجد تيجى تلاقى مكان ليها فاضى.. نسينا نبطل ندّعى اننا عايشين عشان لما الحياة اللى بجد تيجى نقدر نعيشها.. قلنا لنفسنا إننا كده عايشين ومبسوطين وبنضحك فيبقى إيه اللى ناقص؟ إننا نبقى مبسوطين بجد؟ لا، ما احنا بنقول إنها بجد!
أنا عارفة إن لمعة عينيك دموع متدارية مش انبساط.. عارفة إن ضحكك الكتير بلاستر وشاش مدارى بيهم حزنك.. عارفة إنك مش مبسوط.. عارفة إنك بتحاول تحتل أرض حزنك بضحكة وكام سفرية خايبة. أرجوك، اخلى سبيل مشاعرك اللى جواك وفضّى عينك من الدموع اللى مخلياك ماتشوفش غير ضباب، عشان لما السعادة اللى بجد تيجى تلاقى عين ومشاعر تفرحك وتقولك «يلا انبسط، الحياة اللى كنت مستنيها.. جت».