عايز شاى ب«3 جنيه».. ولو سمحت عايز شاى ب«2 جنيه»

مقهى الأخلاق الحميدة

قائمة أسعار قهوة الأخلاق الحميدة:
- كوب شاى: 3 جنيه.
- لو سمحت عايز كوب شاى: 2٫5 جنيه.
- صباح الخير، لو سمحت ممكن كوب شاى: 2 جنيه.
[اطلب بأدب يتخصملك من غير سبب]
توقيع «قهوة إسكندر للأخلاق الحميدة»
فى منطقة العصافرة بالإسكندرية، لم يبذل صاحب مقهى جهداً كبيراً فى مطالبة زبائنه بعودة الأخلاق الحميدة فى التعامل فيما بينهم، قرر أن يضع قائمة أسعار تختلف حسب طريقة الزبون فى الطلب، من يطلب بأدب يحصل على خصم قدره نصف جنيه، من يطلب بأدب شديد يحصل على خصم قدره جنيه، من يطلب بالطريقة التى أصبحت معتادة لدى المصريين لا يحصل على أى خصومات.
محمد سامى، أحد المترددين على المقهى يروى: «كنت أول مرة أقعد مع أصحابى على القهوة دى، عشان إحنا من القاهرة وكنا جايين نقضى يومين وماشين، اكتشفنا أن كل الناس اللى بتقعد فيها عارفين النظام وكلهم بيقولوا لو سمحت قبل أى طلب بيطلبوه».
«سامى» أعجب بالفكرة وخلال اليومين اللذين قضاهما فى الإسكندرية داوم على زيارة المقهى ليل نهار: «أول مرة أشوف قهوة بتعلم الأخلاق وعندها نظام فى المعاملة».
«بيومى»، أحد العاملين بالمقهى، أكد أن المقهى يحاول نشر ثقافة الطلب واحترام العاملين، بعكس ما تبرزه أغلب المقاهى: «من يوم ما القهوة فتحت وصاحب المحل عامل النظام ده على الزباين، بقالنا سنتين اللى ييجى ويطلب باحترام بنعمله خصم، اللى مبيقولش بيدفع ال3 جنيه حق كوباية الشاى، بعدها بنعرفه نظامنا عشان لما يجيلنا تانى».