هنا زاهد باكية خلال الحديث عن مرض والدتها: «طلع ورم خبيث» (فيديو)

لم تستطع الفنانة هنا الزاهد تمالك دموعها خلال حديثها عن مرض والدتها بسرطان الثدي، ورحلة علاجها، وانهمرت في البكاء قائلة: «ربنا خرج المرض وصرفه الحمد لله بس بعد كده جت الفترة الأخيرة حصلها مشكلة تانية، افتكرناها خراج زي ما أحنا متوقعين قبل كده، بس طلع ورم خبيث».
الزاهد: عرفت خبر مرض أمي وأنا بصور مشهد بضحك فيه
وأضافت «الزاهد»، خلال لقاء ببرنامج «معكم منى الشاذلي»، المذاع على شاشة قناة «cbc»، وتقدمه الإعلامية منى الشاذلي، اليوم، «الخبر جالي في التصوير، لقيت فرح أختي بتكلمني وقالتالي حاجة ضايقتني، وكنت المفروض بصور مشهد بضحك فيه، الناس مش عارفة إن الواحد ساعات بيضحك بس هو بجد من جواه بيضايق».
اليوم ده مش بحب افتكره.. بس عشان شغلي قررت أكمل تصوير
وتابعت: «اليوم ده مش بحب افتكره، وفرح كلمتني وقالتالي لو أنتي يا هنا ماما راحت للدكتور، والنتيجة طلعت عندها ورم خبيث، أنا اضايقت جدا بس عشان ده شغلي قولت لازم أكمله، المخرج والمنتج وقفوا التصوير كام ساعة وبعدين روحت اتطمنت على ماما ورجعت ودخلت صورت».
واستكملت: «عاوزة أقول للناس متستنوش على نفسكم لحد ما الدنيا تبوظ خالص، لو أنت شاكك في حاجة روح أكشف، ماما قالت أنا مش هعمل العملية لأن فيه المفروض استئصال، وقالت كلام سودائي ومكناش مستحملين، قولتلها يا ماما معلش عشانا أحنا من غيرك مش هنعرف نكمل، فراحت عملت العملية».
أحنا متعلقين بأمنا عشان خايفين عليها
وواصلت: «قولنالها كلنا يلا يا ماما هنروح ونتبسط ومش هيبقى فيكي حاجة، والحاجة الوحشة السودة دي هتروح، وحياتنا هتبتدي من أول جديد، أحنا متعلقين بأمنا عشان خايفين عليها».