مستشار رئيس الوزراء للإصلاح: اشتغلت مع الإخوان 7 شهور شفت فيهم العجب

قال المهندس هاني محمود، مستشار رئيس الوزراء للإصلاح الإداري، إنه اعتذر عن الوزارة في عهد جماعة الإخوان المحظورة، وشعر أنه لن يستطيع التعامل معهم، بعدما وجد أن الرأي المخالف معهم لن يكون مسموحا به.
وأضاف «محمود»، خلال لقاء ببرنامج «رأي عام»، المذاع على شاشة قناة TEN، ويقدمه الإعلامي عمرو عبدالحميد، إنه قال لهشام قنديل إنه ليس الشخص المناسب لأن خبرته في شركات عالمية ولن تناسبهم في وزارة الإخوان.
مستشار رئيس الوزراء: 30 يونيو كان بالنسبة لي حياة أو موت
وتابع: «كلمني تاني يوم وقلتله لو لقيت حد كويس اختاره أنا هديله 6 شهور من وقتي وأعلمه بدون مقابل من أجل البلد، ثم كلمني الدكتور كمال الجنزوري وقالي أنت ليه رفضت الوزارة، قالي يبقى عندهم حق لما يجيبوا الوزارة كلها إخوان».
وأردف: «قالي أنا هكلم هشام وأقوله أنك موافق، وبعدها بيوم لقيته بيكلمني وقولتله خلاص أنا معاك، واشتغلت معاهم 7 شهور شفت فيهم العجب، هما ناس مش مهتمة بالبلد وكانت ليس لها قيمة بالنسبة لهم، وكانوا بيقولوا أن الحدود دي مالهاش قيمة».
واستطرد: «في يوم رحنا كان حزب الوفد وقسم الدقي بيتهاجموا، وهيبة البلد انتهت، ومدينة الإنتاج الإعلامي كانت محاصرة، وجاء لي أجندة بنصوص الاجتماع الوزاري ورد عليا الدكتور هشام قنديل حينها أن البلد كلها بتتكلم في السياسة، ودورنا الناس تصحى الصبح تلاقي بنزين ومواصلات وأكل وشرب».
واختتم مستشار رئيس الوزراء للإصلاح الإداري، حديثه قائلا: «كانت الضربة القاضية بالنسبة لي كان الإعلان الدستوري المكمل، وحينها قدمت استقالتي، وجاءت لنا رسالة بأن شباب الإخوان طالعين يكسروا الخيم ويهجموا على الشباب، وكان 30 يونيو بالنسبة لي حياة أو موت».
وواصل: «الوزراء الإخوان كانوا بيقولونا أنتم ليه محسسنا إن الحدود مقدسة، أنتم عارفين مين اللي وضع الحدود، المستعمر، كنت بقول إزاي الكلام ده، وحتى أيام الرسول كانت المدينة بيعتبرها دي أرضه وعمل موقعة الخندق، كانوا بيقولوا العالم الإسلامي لازم يكون بتاعنا، إيه المشكلة الخط اللي بينا وبين فلسطين يتزحزح كدة، على سبيل المثال».