أديب عن سقوط الهضبة على المسرح: «لو أنا كان جالي شرخ في الجمجمة»

علق الإعلامي عمرو أديب، على واقعة سقوط المطرب عمرو دياب، على خشبة المسرح في إحدى الحفلات، حيث قال «الهضبة كان تريند وما زال تريند، عشان اتزحلق، والناس بقى تقول لبعضها ألحق عمرو دياب اتزحلق، والناس افتكرت أن فيه حادثة ولا حاجة، دي حاجة بسيطة يا جدعان، زحليقة زي ده متفرقش معاه».
وأضاف «أديب»، خلال تقديمه برنامج «الحكاية»، على شاشة «MBC مصر»، في تعليق كوميدي ساخر، من الواقعة، «بالنسبة لواحد في صحته عمرو دياب وقوة عمر دياب وجيم عمرودياب، زحلقة زي دي متفرقش معاه، قام على طول لو عمرو أديب، اللي وقع كان فيها شرخ في الجمجمة».
وتابع: «بس ده عشان عمرو دياب الهضبة، قام وقف وقالهم عادي عادي عادي أهو، مفيش أي حاجة، الناس كلها أمبارح قلقانة على الهضبة وبتاع، عشان لما يتزحلق الدنيا كلها بتقف وتتفرج وتشوف إيه الحكاية وإيه الموضوع، من كتر الرياضة والصحة اللي عنده، الحاجات دي متفرقش معاه».
وواصل: «عمرو دياب عنده ركبة حديدية، ركبة غير عادية، يكمل غناء بعد ما وقع، عادي جدا، عادي جدا، ألف سلامة يا هضبة، معرفش عين مين اللي جاتلك إمبارح بس خير وألف سلامة».