هاني شاكر يلوم عمرو أديب على إذاعة "بنت الجيران".. والأخير يرد

تحدث المطرب هاني شاكر، نقيب المهن الموسيقية، عن حفل استاد القاهرة وغناء حسن شاكوش أغنية "بنت الجيران" ووجود لفظي "الخمور والحشيش" بالأغنية، قائلا: "هما وعدوني إن الكلام دة هيتغير، مينفعش يتقالي حاجة ويرجعوا في كلامهم".
ووجه كلامه لعمرو أديب خلال برنامجه "الحكاية"، المذاع على شاشة "MBC مصر"، قائلا: "أنا بستغرب والله ياعمرو انت أخويا وحبيبي طبعا، أنا بستغرب إن الغنوة تطلع عندك كدة في البرنامج يعني طلعت الغنوة والكلمة موجودة أشرب خمور وحشيش عندك في البرنامج"، مستكملا: "احنا لما بنسهل للولاد دول الكلام دة والناس تشوفه على الشاشات الكبيرة والناس الجميلة اللي زي عمرو أديب بيفتكروا إن دة عادي وطبيعي، لا دة مش عادي وطبيعي".
ورد عليه الإعلامي عمرو أديب قائلا: "حضرتك دة جالي بعد ما اتقال إن هاني شاكر قاله إن هو ناجح يعني أنا حطيت الأغنية بتاعته بعد ما اتقال إن الراجل عضو نقابة"، فرد عليه "شاكر" قائلا: "انت مسمعتش الغنوة كلها على بعضها، أنا اتفاجئت في الحفلة إنها نازلة زي ماهي خمور وحشيش، لأ إحنا مش للدرجة دي"، فقاطعه "أديب" قائلا: "موضوع الحفلة بتاعت امبارح هو دة اللي حرك النقابة"، فرد عليه "بالضبط".