وزير النقل يطمئن أصحاب العقارات حول الدائري: «مش هنرميهم في الشارع»

أكد المهندس كامل الوزير، وزير النقل والمواصلات، أنه سيتم تأهيل وتطوير الطريق الدائري وتعويض المواطنين الذين سيتم أخذ منازلهم في خطة تطويره بقوله، «مش هنسيبهم ولا هنرميهم في الشارع»، وموضحًا «على الجميع أن يعلم أن الدولة تصرف على الطريق الدائري لتطويره 10 مليارات جنيه من أجل توسيعه، فضلًا عن 4 مليارات جنيه آخرين تعويضًا لأهالينا الذين يسكنون حول الطريق اللي هناخد منهم بيوتهم».
وأضاف «الوزير»، خلال مداخلة هاتفية في برنامج «الحكاية»، مع الإعلامي عمرو أديب، على شاشة «إم بي سي مصر»، أن الدولة ستنفق 14 مليار جنيه، من أجل تسهيل حياة البشر وتيسير تحركاتهم، «عشان متكنش الدنيا مخنوقة للي خارج من القاهرة ورايح بلده سواء في الدلتا أو الصعيد ويقدروا يتحركوا».
وأشار وزير النقل والمواصلات أن الطريق الدائري عبارة عن دائرة في القاهرة الكبرى يخرج منها 14 شريانا رئيسيا في اتجاه الدلتا والصعيد ومدن القناة وكل شيء، «لو أصبح مخنوق محدش هيقدر يتحرك، الدولة بتصرف على الكلام ده، لأن ده مسؤولية الدولة تجاه مواطنيها، وحقهم عليها».
وأوضح «الوزير» أن الطريق الدائري له حرم بقرار جمهوري «اللي ساكنين واللي عاملين مصانع عارفين أن حرم الطريق الدائري 50 مترا على جانبيه، مش المفروض حد يبني فيها، بس إحنا بقى بندي للي بنى ما يسمى بالتعويض الاجتماعي عن شغل وحدة سكنية أو قاطن وحدة سكنية مبنية في بيت مخالف من غير رخصة على أرض الدولة، بس الرئيس عبد الفتاح السيسي، قال لازم ياخد تعويض اجتماعي عشان ياخد المبلغ ده ويطلع يأجر في نفس المنطقة أو في منطقة تانية، أو يكون فيه في المحافظة إسكان ياخد شقة مش هنسيبه ولا هنرميه في الشارع».