الباعة المتجولون تعليقاً على «منظومة الخبز»: صاحب الفرن كسبان

بائع «عيش» فى الشارع: «مالناش نصيب فى الشغلانة دى وهابيع فاكهة أحسن»

«مصائب قوم عند قوم فوائد» مثل شعبى ينطبق على حال بائعى الخبز المتجولين والمتمركزين فى الشارع، ففى الوقت الذى يستفيد فيه أصحاب الأفران من تطبيق منظومة الخبز الجديدة، لأنها ستساعدهم على الحصول على مكاسب دون اللجوء إلى بيع الدقيق فى السوق السوداء، فإن الآلية الجديدة أصابت تجارة البائعين الآخرين فى مقتل، ودفعت الكثير منهم للتفكير فى تغيير النشاط التجارى، لأنها سوف تتسبب فى زيادة أسعار الخبز لدى بائعى الشارع، وبالتالى العزوف عن شرائه.
ربيع عيسى، يعمل فى مهنة بيع «العيش» منذ أكثر من 15 عاماً، بعد فشله فى الحصول على وظيفة بسبب ظروفه الصحية. يفكر الآن فى تغيير مهنته، بعد تطبيق منظومة الخبز الجديدة: «مالناش نصيب فى الشغلانة دى، محدش هاييجى يشترى مننا تانى، أنا حاولت أغير وأبيع فاكهة، لكن مسئولى الحى موافقوش».
يوضح «عيسى» أن تطبيق المنظومة الجديدة للخبز سيجعل المواطن مكتفياً بالخبز الذى سيحصل عليه من الفرن: «دلوقتى لو أسرة مكونة من 4 أفراد هياخد 20 رغيف بجنيه، يعنى الرغيف بشلن، إنما لو جه يشترى منى هياخد الرغيف بربع جنيه يعنى ال20 ب5 جنيه، إيه اللى هايجبره على كده؟».
محمد عبدالستار، صاحب فرن فى نفس المنطقة، حوّل للمنظومة الجديدة: «كنا بناخد غرامات كتيرة فى الأول ومحاضر، ولسه بنسدد فيها لغاية دلوقتى»، ويضيف: «أيام مبارك كان فيه نظام مكافآت، لو أنتجت عيش كويس بناخد على الشوال 5 جنيه». يرى «عبدالستار» أن المنظومة الجديدة لها مميزات كثيرة بالنسبة لأصحاب الأفران: «هيمنع تسريب الدقيق، الفرن كان بياخد على الأقل 20 شوال، مبيعملش عيش بشوالين، والباقى سوق سوداء علشان مكناش بنكسب، إنما دلوقتى هانتحاسب على إنتاجنا حسب بطاقات المواطنين اللى اشتروا مننا».
ويضيف «عبدالستار»: «العيش قبل كده ماكنش بيتاكل، ما فيش رقابة على المطاحن، نسبة الردة فيه عالية، ولون الرغيف أسود»، لافتاً إلى أن المنظومة الجديدة سوف تؤثر على بائعى العيش المتجولين مردداً: «كده أفضل، العيش بيتعرض للتلوث، وحاطينه تحت العربيات فى الشارع، والقطط بتمشى عليه».