انقلاب مأذون

زغرودة يا أم العروس
ولدك بقى راجل
هنجوزه وراح يهيص
وخلاص مهوش فاضل
غير بس نعمل صوان
ونزفه للدخلة
كام صورة لاجمل عروسة
فى البلد داخلة
..
مأذون بلدنا وصل
لا صوت ولا حركة
بوسنا إيديه كلنا
علشان ننول بركة
مسك القلم حضرته
وكتب على ورقة
الليلة دى دخلتى
والعفة مش فارقة
وعريس وأهله وعروسته يروحوا فى غرقة
أنا العريس يا جدع
والدخلة دى بتاعتى
لموا الصوان وارحلوا
هادخل على جماعتى
..
بص العريس واندهش
مولانا إيه ماله؟
الفرح فرحى أنا
ده إحنا آمنا له
يكتب كتابنا ويبقى كل شىء رسمى
ييجى قبل ساعة الفرح
يشطب على اسمى!
إزاى أكون العريس
والشقة من كدى
ودفعت عمرى فدا
لعروستى أنا وحدى
تيجى بجرة قلم
تخطفها يا جدى
شكلك وحش جنبها
انزل وخليها
فاتحة بيبان قلبها
للى يهنيها
وارجع على جبهتك
يا عم واحميها