«أكرم» ورفاقه يحولون 2014 إلى «عام السعادة» والسبب: «السيسى رئيسى»

جابوا الشوارع ليشاركوا المارة فرحتهم بالرئيس

ابتسامات يقابلون بها المارة، أعلام مصر بين أياديهم، سيارات ربع نقل مكشوفة يجوبون بها شوارع المحروسة لينقلوا سعادتهم بعد تنصيب المشير السيسى رئيساً للجمهورية «قلنا ننزل الشارع ونلف على الناس كلها نشاركهم الفرحة»، قالها أكرم حسين وأصدقاؤه الذين قرروا أن يشاركوا احتفالات المصريين هذه المرة بشكل جديد.
«عام الابتسامة».. شعار أطلقه الشاب العشرينى وأصدقاؤه على مبادرتهم حتى ينقلوا روح البهجة فى نفوس المارة «لغة الحوار بيننا وبين الناس مش أكتر من الابتسامة، إحنا مش بنطلب منهم أكتر من أنهم يفرحوا عشان الناس كلها تعيش مبسوطة وراضية»، مضيفاً «إحنا أصحاب ملناش أى ميول سياسية ولا تبع أى تيارات ولا أحزاب، وكل هدفنا نخلى السنة دى كلها فرحة وبهجة بين المصريين، والابتسامة ببلاش مش هتخسر حاجة لو عملتها وابتسمت فى وش غيرك وخليته يفرح زيك».
جاب «أكرم» وأصدقاؤه الشوارع داخل سيارة مكشوفة وسط احتفالات المواطنين «بقالنا 3 أيام بنأجرها ونمشى بيها بين الناس عشان نحتفل بالسيسى ومصر اللى هتبقى جديدة على إيده، والنهارده فكرنا ننزل بيها نقول للناس ابتسموا عشان تبقى سنة حلوة على بلدنا وعلى كل اللى فيها»، مشيراً إلى أن «الناس طول ما إحنا ماشين بالعربية بتبقى فرحانة واللى بيوقفنا يتصور معانا، ولما بنلاقى الناس بتبتسم فى وشنا بنعرف أن هدفنا وصل للناس».