رسالة للرئيس

سيادة الرئيس.. أولاً مبروك ليك فوزك فى انتخابات الرئاسة المصرية «أعانك الله علينا وأعاننا عليك».
لازم، قبل أى حاجة، نفخر كلنا كمصريين إن دى فعلاً وبدون أى مبالغة أول انتخابات حرة ونزيهة.. أول انتخابات مافيهاش رشاوى انتخابية.. أول انتخابات مافيهاش من الزيت والسكر.. أول انتخابات مافيهاش شحن أوتوبيسات.. أول انتخابات مافيهاش تسويد بطاقات ولا تقفيل لجان.. أول انتخابات محترمة.
أنت، سيادة الرئيس، أول رئيس بانتخابات حرة نزيهة.. فأهلاً بيك.
احنا سعداء إنك رئيس خالى من الديون.. انت رئيس ماعليكش حاجة لحد وماحدش كاسر عينك.. أصواتك كسبتها بشعبيتك حتى حملتك للأسف فشلت تجمع لك أصوات.. الأحزاب اللى أعلنت دعمها ليك ما عملتش حاجة على الأرض ليك.. حتى حزب النور اللى قعد طول أيام الانتخابات يحاول يصدّر لنا إنه حشد أصوات السلفيين عارف كويس إننا ما أكلناش من الكلام ده وإنهم فشلوا فى حشد قواعد السلفيين.. ماعملتش أى صفقات مع رجال الأعمال أو أصحاب المصالح علشان تغمض عينيك عن فساد حد.
انت مش متخيل سعادة اللى انتخبوك قد إيه بإنك ما عليكش دين لحد.. وعلشان كده عندنا رسالة ليك.
أرجوك، خلى عينك دايماً ع البلد. إوعى حد يلوى دراعك بأى حاجة مهما كانت، وثق إننا فى ضهرك وبندعمك طول ما انت على الخط السليم.
أرجوك فعّل القانون بقوة وبحزم وعلى الكل، إوعى تقع فى فخ ابتزاز البعض ومحاولة إنهم يبقوا فوق القانون.. أرجوك خلى الكل سواسية تحت مظلة القانون.
رجّع لنا الأمن مهما كان التمن لأنه مفتاح الحل لمعظم مشاكلنا.. السياحة هترجع.. الاستثمارات هترجع.. الاقتصاد هينتعش.. كل ده هيحصل بعد الأمن والأمان ما يرجعوا.. بصراحة يا ريس، وحشتنا مصر اللى كنا بننزل نتمشى فى شوارعها فى أى وقت من غير خوف.. اللى كنا بنام من غير ما نعرف باب البيت مقفول بالمفتاح ولا لأ.
أرجوك ارتقى بذوقنا العام فى كل حاجة، اهتم بالثقافة والفن والإعلام، لأننا محتاجين إعادة تأهيل بعد اللى حصل فينا على مدار ال3 سنين دول.
خلى عينك على الغلابة «ولو أن كل المصريين فى نظرى غلابة بطريقة أو بأخرى»، بس من فضلك خلى عينك على الغلابة.. طبطب عليهم.
ساعد الشباب إنهم يبنوا البلد معاك.. خد بإيدهم.. علمهم وطوّر مهاراتهم.
مش هوصّيك على الستات.. انت عارف اننا وقت الجد رجالة، واحنا عارفين انك هتقدّر دورنا فى المجتمع وهتاخد بالك مننا.
خلى بالك من بطانة السوء وحاشية الندامة.. ابعد عنك كل المشبوهين أياً كانوا مين.. انت مش مديون لحد وماحدش يقدر يبتزك.. اسمع اللى يقولك ع الغلط أكتر ما تسمع للى بيطبّل لك.. اللى بيحبك هيقول لك الحقيقة مش هيطبل لك.
حط كل شخص فى حجمه الطبيعى وأخرس أى لسان يتكلم باسمك دون إذنك.
لازم تعرف إنك مديون للشعب بس مش أى حد تانى.. الشعب هو اللى تعب علشانك، وهو اللى هيسندك مش أى حد تانى.. انت قصادك تحديات كتير وهتتعب كتير، فلازم تكون عارف إن الشعب هو اللى هيقوّيك مش أى حد تانى.. دينك للشعب فقط لا غير.