م الآخر| امتحان.. لم ينجح أحد

بمناسبة اننا داخلين على موسم الامتحانات، والامتحانات كل سنة تزداد غرابة، قررنا نتعمق أكتر وندخل في أدمغة الناس اللي بتعاني في تلك الأيام من سهر الليالي، والتطبيق لتاني يوم الصبح.
لأ مش قصدي الطلاب اللي موسم الامتحانات بالنسبة ليهم عالم الجحيم، أنا بتكلم عن اللي موسم الامتحانات بالنسبة ليهم "عالم سمسم" بما انهم بيتخذوا الأمور كلعبة بالنسبة ليهم، وهي أدمغة مربيين الجيل وكل جيل "سنسور الجينيريشن"، المدرس اللي بيكتب الامتحان.
وبما أن امتحان العربي هو المفتتح الدائم لامتحانات الثانوية عامة و الشهادة عامة، فهندخل في دماغ مدرس العربي اللي بيحط الامتحان (بيحط عالامتحان):
المكان الحالي: داخل دماغ المدرس
"بسم الله الرحمن الرحيم، صلي بينا عالنبي، طب زيد النبي صلي، هو احنا كنا هنقول ايه؟ الامتحان؟ آاه الامتحان.. دلوقتي عايز استرجع المعلومات اللي قريتها من كتاب "كيفية تعقيد نفسية الطالب"، ولا أراجع على كتاب "رباعيات مدرس مجنون"، ولا كتاب "امتحان مُعقد بس عامل نفسه في مستوى الطالب العادي (الملقب ب أنا مش أنا)، ولا أقولك أنا هاجمع ما بين التلاتة وأتوكل على الله.
أول سؤال.. سهل خالص، السؤال الذي أثبت الطلاب جدارتهم في إجابته على مدار تاريخ الامتحانات، والسؤال هو: الإسم، رقم الجلوس، ولسهولة هذا السؤال بنفكر جديًا إننا نغيره، ما هو مينفعش نرمي درجات بالساهل كده، يعني ممكن المرة اللي جاية نخلي السؤال: 1- اذكر اسم جد جد جد جدك السابع عشر، 2- خمن رقم الجلوس اللي كنا هنديهولك (ولو غلطت يبقى راح عليك الامتحان كله).
السؤال الثاني هيكون التعبير:
القاهرة تُسمى بمدينة الألف مأذنة، اكتب أسامي الألف مأذنة، واوصف لي شكل جدران كل مأذنة بالنقوش اللي عليها، ولا تنسى أن تذكر حقوقنا، وواجبتنا نحو تلك النقوش.
السؤال الثالث في القراءة:
أ اذكر اسم الشخص اللي كتب هذا الكتاب؟ (ده نوع من تجديد و مفاجأة الطالب).
ب كاعتياد الطالب المصري أنه يحفظ الكتاب صَم، وممكن يسَمع الدرس زي ما بيسَمع النشيد الوطني، ولذلك السؤال هيكون: اذكر لي النصائح الهامة الموجودة في ظهر الكتاب، وبالترتيب، والتشكيل الصحيح، ولو الطالب غلط في كلمة أو حرف أو ترتيبهم، هينقص درجتين على كل غلطة.
ج ما جمع كلمة "مرأة" (هتقولي لا جمع لها، هقولك لأ بقى ثبتت في دماغي ان ليها جمع، وآهي غلاسة كدة).
السؤال الرابع (النصوص):
أ) اذكر لي فيما كان يفكر الشاعر بعد ما خلص كتابة القصيدة؟ وما وجه النصوص في ذلك؟.
ب) اشرح لي التعبير الذي حاول أن يعبر عنه الشاعر بوجهه أثناء كتابته الشعر؟، ويا ترى هل كان "مكشر" حواجبه أم "لاوي بوزه" أم الاثنين معًا؟.
ج) اكتب جميع قصائد الشعر التي كتبها الشاعر في حياته.
د) أول كلمة نطقها الشاعر في حياته كانت "ماه"، اختار ما بين الجمل الآتية المعنى البلاغي لهذه الكلمة مع شرح أسباب اختيارك:
1- تدل على عمق الشاعر منذ نعومة أظافره، فهو حتى عندما كان "يقشط" على كتف أمه كان "بيقشط" شِعر.
2- تدل متابعته للأفلام منذ صغره؛ ما أسس فيه الحس الفني، فتلك الكلمة التي قالها محمد هنيدي في فيلم (فول الصين العظيم)، والتي كان معناه في الفيلم (يا قليل الأدب).
3- تدل على إنه إنسان متواضع، فتواضعه أوصله أنه ينطق أي كلام زي كل الأطفال العاديين، ولم ينطق شِعرًا.
السؤال الخامس و الأخير:
أ) السؤال اللي مخطرش على بال تلميذ أو مدرس قبل كده: ما هو النحو؟.
ب) سؤال الإعراب: أعرب الجملة اللي بفكر فيها دلوقتي، وحدد موقعها من الإعراب، وتوقيتها.
ج) "بوس الواوا خلي الواوا يصح".. ما أصل كلمة "الواوا؟"، واذكرلي مشتقاتها.
في نهاية الورقة: نتمنى لكم النجاح والتوفيق (وآدي دقني لو نجحت).