وزير التعليم: موجودين في كل مجموعات الغش.. وعندنا الأسامي والأرقام

استنكر الدكتور طارق شوقي وزير التربية والتعليم والتعليم الفني، إصرار بعض الطلاب وأولياء الأمور على الغش ونقل الأبحاث.
وقال وزير التعليم، خلال مداخلة هاتفية مع الإعلامية سارة حازم مقدمة برنامج "مساء DMC": "قلنا إننا عاوزين الولد يبذل أي قدر من الجهد ونعلمه العمل الجماعي والتعلم والمحاولة، إنما غير كده بنعلمه الغش وإنه يبقى غير صادق وإنه يحط على حاجة مش بتاعته وإن تجيله النتيجة بلا تعب".
وأضاف: "عندنا طريقة إننا نعرف لو البحث الطالب عمله ولا لأ، نقدر، وموجودين في كل مجموعات الغش، وعارفين بيغشوا إزاي، وعارفين مين اللي بيغش، وعندنا أساميهم وأرقامهم".
وتابع: "عاوزين يستقر في وعي الناس إننا نفسنا نتعلم مش نغش وخلاص، إننا نحط الكاميرات ونراقب الناس مش دي جذور المشكلة، جذور المشكلة، إننا نسأل نفسنا، عاوزين نتعلم ولا كل حاجة بلا جهد".
وأشار إلى أن الوزارة تقدم طرق التعلم: "واللي مش عاوز يتعلم لازم يواجه نفسه، وإحنا قررنا نعمل المواجهة دي دلوقتي، لأن الدولة بتصرف على التعليم، ويجب أن الفلوس اللي بتتصرف تذهب في مكانها لمن يريد ويحاول أن يتعلم، ومن لا يريد أن يتعلم فهو مسؤول عن نفسه".