م الآخر| ارحموا شعب مصر

شعب مصر من أكتر الشعوب في العالم صبرا، فمنذ 30 عامًا والناس صابرة، كل مرة كان "مبارك" بيترشح فيها للحكم، والناس صابرة، لما الناس الغلابة تنتظر حلم ارتفاع البورصة علشان يمكن حياتهم تتغير، صبرنا على حكم عسكري تحت قيادة طنطاوي، وصبرنا أيام فترة حكم "مرسي"، وصبرنا لما شلنا مرسي، وبرده صابرين. سبحان الله تكلم الواحد مننا تلاقيه عنده مبدأ الرضى أوي يقولك: "الحمد لله الإخوان غاروا؛ مصر بكره حتبقى كويسة... بس!"
بس لما تلاقي الناس المثقفة (اللي بياكل كويس، ورغيف العيش لو بمليون جنيه حجيبوه) يرفعوا لسانهم على الشعب الجبار، ويطالبوا بتغيير الشعب؛ لأنه بيتألم من المعاناة اليومية، ويقولك لازم الشعب يصبر، يبقى لا وألف لا!.
الشعب يصبر على ايه.. الأسعار الغالية في الأكل والشرب، ولّا يمكن اللبس، عارف لو نزلت انت كشاب مُرَتبك 1000 جنيه، وحبيت تفطر شوف حتجيب بكام فول وطعمية (من على عربية فول عادية)، ولّا يصبر على غلاء الأسعار في المواصلات.. كل سواق تاكسي بيزود اللي بيزوده واللي عاجبه بقا، ولّا يمكن الشعب يصبر على الأمن اللي مبقاش عارف يلاقيها منين!، ولّا يمكن الشعب يصبر على وساخة المستشفيات الحكومية وغلاء أسعار الأدوية، ولّا يمكن الشعب يصبر على وساخة البيئة اللي عايش فيها، ولّا يصبر على رغيف العيش، كل اللي قولته ده هو الأساسي في الحياة العامة اللي لازم تتحل ومفيهاش اصبروا، ومن وجهة نظري لا تتعارض مع أي خطة من خطط الحكومة.
ويقولك الشعب لازم يشتغل في مكان واحد، طب ازاي وهو وراه أكل، وشرب، ومستشفى، ولبس، وعلاج، وتعليم... الناس لازم تحس بالناس، ليه الناس المثقفة مش قادرة تفهم انهم بيتاجروا بأسامينا من غير توكيل مننا.. ليه دايمًا فاكرين إننا تبع ناس معينة ونازلين علشان هما أمرونا، وانا أقسملك إننا لما نزلنا يوم 25 يناير ماكناش ورا حد، ولا حد من النشطاء اللي سربوا لهم تسجيلات تدل على خيانتهم هو القائد بتاعنا، الناس الغلابة اللي نزلوا يوم 25 كان نِفسهم إن مصر تبقى أحسن بلد.. تبقى أفضل من كل حاجة، الكل كان جمب بعض علشان مصر، الناس اللي ماتت ماتوا علشان مصر.. ارحموا شعبنا يرحمكم الله.