م الآخر| خواطر "أبونضارة" كعب الكوباية

- الفترة اللي فاتت كان فيه كلام كتير عن (ترشح) السيسي وكل يوم (تسريبات) لعبد الرحيم علي، وكل شوية تفجير (مواسير) الغاز في سيناء، مش ملاحظين حاجة إن مشاكلنا دي مش هيحلها غير واحد سباك!.
- النخبة بتاعتنا اللي هي كريزة التورته.. بعد ثورة يناير رقصت على بلاط المجلس العسكري، وبعد ثورة 30 يونيو رقصت على بلاط وزارة الدفاع، طيب يا رب حمدين هو اللي ينجح، عشان يروحو يرقصوا على شواطئ بلطيم والناموس يهري جتتهم ونخلص بقه.
- يا أخي تشوف الأخ الناشط بتاع مدينة نصر "الملظلظ" ده وهو ضامم شفايفه تحس إنه زي البنت البكر، ولما تسمعه في التسريب الشهير وهو بيتكلم مع ابن القرضاوي، تحس ان البنت البكر.. راحت في الوَبا.
- بعد نجاح حركة تمرد في مصر قام الأشقاء القطريين بعمل حملة مماثلة، ولذلك قررت السلطات المصرية إرسال كشكول صفحة وصفحة عشان الإخوة القطريين يجمعوا فيه التوقيعات.. والله يا مصر انت قلبك قلب خسايه.
- والنبي يا جماعة.. حد يبلغ "توكل كرمان" بسرعة إن بلدها اتقسمت ستة أقاليم، عشان ما حضرتش القسمة لأنها كانت في زيارة للإقليم السابع "قطر" محبس السياسة كان مقفول علينا منذ عهد عبد الناصر وحتى عهد مبارك، وأول ما المحبس اتكسر بعد الثورة الدنيا غرقت سياسة وبعد كده اتجمعت في حتة واطية، فكانت بيئة مناسبة جدًا لبكتيريا نشطاء السبوبة.
- عندما تسأل محبي الفنون التشكيلية أثناء وقوفهم وهما فاتحين بقهم أمام لوحة لأحد الفنانين وتسأله.. ماذا رأيت في اللوحة؟، يقول لك رأيت كذا، ثم تسأل الثاني يقول لك شيئًا آخر، وعندما تسأل "الفنان" نفسه صاحب اللوحة، يقول لك.. والله دي عبارة عن ورقة كنت مغطي بيها كرتونة البيض، كل ما هنالك اني بروزتها بس.
- قال حمدين صباحي.. لو فزت بالرئاسة سأبقى على السيسي وزيرًا للدفاع.. أنا شخصيًا كنت مصدق حمدين صباحي بأنه سيبقى على المشير، ولكنه كان سيبقي عليه "وزيرًا لخط دفاع" فريق نادى طلائع الجيش، وكده الراجل مكدبش ماهو كله دفاع برضه.
- واضح إن "بوتفليقة" قاعد في جزيرة لوحده، ومش هيفوق إلا لما الجزائر كلها، عندما يقتحم الإسرائليون المسجد الأقصى وترد حماس بمحاولة اقتحام معبر رفح.. برافو حماس فقد حققتم هجمة مرتدة رائعة أسفرت عن إحرازكم هدفًا.. ولكن في مرماكم.
- تطالب المرأة دائمًا بمساواتها بالرجل، عمومًا مفيش مانع بس نتفق الأول، مين اللي هيطلع أنبوبة البوتاجاز.
- يا ترى ليه حزب النور (قاطع) اليومين دول ومحدش سامع حسه، وبكار كمان مختفي، يكونش عنده أزمة زي محطات الكهرباء؟، ولا مش عارف ياخد (وصلة) من الأحزاب الليبرالية لاختلاف قوة (التيار)!.