م الآخر| أيوه أنا مطبلاتشى

لو التطشبيل من من وجة نظرك إنى أؤيد جيشى فأنا مطبلاتشى، (ده طبعا على أساس إنى المفروض أؤيد جيش موزمبيق مثلا).
لو التطشبيل إنى بأيد السيسى عشان شايف فيه ضالتنا التى كنا نبحث عنها فأنا مطبلاتشى، (ده طبعا على أساس إن المفروض أشوفك انت هتأيد مين وأؤيده عشان انت محتكر التفكير واحنا عندنا راس كرمبه :D).
لو التطبيشل إني أرفع صور السيسى عشان عاوزه يبقى رئيس عشان مقتنع بيه وده رأيى فأنا مطبلاتشى، (وده على أساس إنك لما بترفع صور مرسى ولا حتى حمدين ده بيبقى اسمه حرية رأى).
ولو التطشبيل -حسب كلامك- هو إنى أقول إن السيسى راجل المرحلة، واكتب كده على يافطه فأنا مطبلاتشتى، (ده طبعا على أساس إن السيسى متشتمش على كل حيطه فيكى يا مصر وإنت منطقتش الشتيمة حلال والتأييد حرام).
يا سادة، لو حبينا نحط تعريف فعلى للتطبيل هنلاقى إنه ناس عايشة على مبدأ عاش الملك مات الملك، (وخد بالك من اللى جايه دى)، لتحقيق مصلحة شخصية.
واحنا كلنا والراجل الغلبان اللى فالشارع وأمى اللى على قد حالها اللى بتنزل ترفع صورة عبد الناصر أو حتى السيسى والله مالها مصلحة شخصية دى ناس تعبت بجد، وما صدقوا حسوا إن فيه راجل ممكن يحكم بجد، وحسوا بالأمل في بكره معاه، وإن يمكن بكره عيالهم هما اللى يعيشوا كويس مش هما كمان لأنهم عارفين إن لسه شوية عشان نوصل للعيشة الكويسة وربما عمرهم لن يطول حتى يذوقوا طعم الراحة.
اه صح افتكرت حاجه كمان هو انت ليه مصمم تفصل في كلامك بين الجيش والشرطه والشعب؟!، ده على أساس مثلا إن الجيش ده جايبينه إعاره من كينيا والشرطه دى اصلا كلها تشيكييين (نسبة إلي دولة التشيك).
ما الجيش هو الشعب والشعب هو الشرطة والشرطة هى الجيش ولا ايه؟!.
‫استقيموا يرحمكم الله‬
خد الطشبلة وسلام