م الآخر| فين الاخلاق دى؟

هبدأ كلامى بجملة قريتها على الفيس بوك بتقول "واحنا صغيرين كانوا بيقولولنا إن مصر (هبة) النيل، ونهرها (خالد)، ولما كبرنا بقى لقينا خالد بيشرب مخدرات وهبة اشتغلت رقاصة".
السؤال بقى هنا هى فعلا أخلاقنا رايحة فى الاتجاه ده؟، زمان كانوا بيتكلموا معانا ويقولولنا احنا لازم نحترم الكبير، ونعطف على الصغير، ودلوقتى تلاقى الولد يبجح فى الأكبر منه ويضرب الأصغر منه، ولما تقوله ليه كده، وغلط يا حبيبى، يرد ويقولك انتا مالك ملكش فيه، وحتى مع الأهل تلاقى الولد بقى بيبجح فى أبوه وأمه والبنت تقولها ملكيش دعوة باللى أنا بعمله، أصل انتى موضة قديمة، أصل كل صحابى بيعملو كده؛ طب وبعدين احنا الدنيا رايحة بينا على فين؟ والأخلاق بتضيع مننا ليه؟، واحنا بقينا كده إزاى؟، بس يمكن عشان أهالينا مبقوش يقضو معانا أوقات كتير زى زمان، يكلمونا ونكلمهم، يمكن عشان كل واحد بقى له 100 حاجة تلهيه عن أهله يمكن عشان ظروف المعيشة اللى بقى بيحاول الأهل يوفروها لولادهم ويعيشوهم كويس.
فى الأخر حابب إنى أقول حاجة شايفها من وجهة نظرى، احنا لو مرجعناش للأخلاق دى تانى يبقى عليه العوض فى كل الاجيال اللى ها تطلعلنا دى.