بالصور| الإضراب يورث الاعتصام: ركاب ملّوا من انتظار الأتوبيس.. فقرروا الاعتصام في الموقف

محاسب: هما بيستغلونا في الضغط.. واحنا هنستغلهم للحصول على حقنا في مواصلات آدمية

اصطفوا بطول الموقف في انتظار لا تظهر عليه بوادر انتهاء، توالت نظراتهم إلى بعضهم في تعجب من غياب أتوبيسات النقل العام عن موقف عبدالمنعم رياض هذا الصباح، صمت لا يلبث أن يزداد وسط تطاير لخبر "مفيش أتوبيسات النهاردة"، وفي محاولة للتعرف على ملابسات الموقف يسأل أحد الركاب مدير الموقف عن سبب هذا الغياب ليرد عليه بلا مبالاة لا تتناسب مع ازدحام "الموقف": "السواقين عاملين إضراب".
أمس الأول، بدأ العاملون بهيئة النقل العام إضرابًا عن العمل، وفقًا لدعوة وجهتها إليهم النقابة العامة المستقلة، لرفع مطالب تضمنت تطبيق الحد الأدنى للأجور على العمال، وزيادة بدل طبيعة العمل بنسبة 100% أسوة بعمال مترو الأنفاق وهيئة السكك الحديدية كبديل عن تطبيق الحد الأدنى، وتوحيد حافز الإجادة بمبلغ 500 جنيه بديلاً عن حافز الإثابة.
"هما مش ضربولنا اليوم بالإضراب واتخصملنا؟.. يبقى خلاص هنعتصملهم هنا في الموقف مورناش حاجة" قالها مصطفى- محاسب بإحدى الشركات في الشيخ زايد- جامعًا حوله عددًا كبيرًا من الركاب، فيما يزداد التكدس على رصيف الموقف، ينتهز سائقو الميكروباص الفرصة لرفع سعر الأجرة على خط "التحرير- الشيخ زايد" لتصبح 3 جنيهات بدلا من جنيهين ونصف.
"انتو مش لسه عاملين إضراب من كام شهر، عايزين نروح أشغالنا حرام عليكم"، حالة الغضب التي تملّكت الركاب دفعتهم لاتخاذ القرار "في كل إضراب للسائقين سنعتصم في المواقف، ما هما بيستغلونا في الضغط عشان ياخدوا حقوقهم، وإحنا كمان هنستغل ضغطهم عشان ناخد حقوقنا في مواصلات محترمة".
"ما احنا يا نستنى هنا لحد بالليل، إما نسيب نفسنا لجشع سواقين الميكروباص اللي بيزودوا علينا الأجرة" مبرر ساقه الركاب في تجمعهم بموقف عبدالمنعم رياض، يدبرون الحال لاعتصام يوازي إضراب السائقين، "هنرجع لما يرجعوا" قالها أحد الركاب المنتظرين على الرصيف، مؤكدًا أن أوضاع البلد لن تتحسن "طالما كل واحد واخد قرار إنه ياخد حقه بدراعه وبالبلطجة والإضراب، يبقى مفيش حاجة هتتغير".