فلانتَينى اللى فات

أكيد من العنوان حد حيقول.. معقول؟!.. هوه بعد العيد ينفتل كحك؟! ولا بعد الفلانتين ينفع كلام فى الحب؟! حقوله: فى الحالة الأولى جايز.. بحكم العادات والموروثات.. رغم أنها مش قاعدة.. لأن فيه ناس بتكحكح «أى بتعمل كحك وتاكل كحك»، بعد العيد عادى.. أما فى الحالة الثانية، حقوله: طبعاً ينفع الكلام فى الحب قبل الفلانتين وبعد الفلانتين، وفى كل وقت.. والأهم من الكلام فى الحب.. هو الحب نفسه يا حبِّيب.. الحب نفسه أهم من الكلام والورد والكروت والدباديب.. وحقول للفلانتيين:
فلانتينى اللى فات / ليه عدى من سكات / يكونشى مات فى قلبى / ولا قلبى اللى مات
فلانتينى اللى عدَّى / ما وقفش ليه وهدَّى / وقال للقلب إصحى / اليوم.. عيد المودّة
فلانتينى يا صاح / خلاص ولَّى وراااااح / حيرجع بعد عام / مش حيلاقى صلاح
ههههههههههههه.. طبعاً الله أعلم حيلاقينى ولا لأ.. ولو لقانى حفتكره ولا لأ.. وححتفل بيه ولا لأ.. وحكتب عنه وفيه ولا لأ.. أصل بصراحة يا جماعة أنا عرفت الفلانتين دا على كبر.. وكنت دايماً أتعامل معاه بسخرية.. وماكنتش معترف بإن فيه عيد اسمه الفلانتين.. وكنت على طول بنسى يعنى إيه فلانتين.. وأسأل وأعرف وأرجع أنسى تانى.. أقول لكم حاجة بس بينى وبينكم.. أنا كنت بضايق لما حد من صحابى يقولى «إنت رومانسى قوى»، كنت بأعتبر كلمة رومانسى دى سخرية من رجولتى.. وإنى بتاع كلام وشعر وحنية صدر وخلاص هههههههههههههههههه.. يا رب تكونوا فهمتم قصدى، لأنكم لو كنتم فهمتم حتقهقهوا مثلى.. وعودة إلى فلانتينى اللى فات.. أهديكم يا أحبابى هذه الكلمات:
(1) طيارة ريح القمر
■ ■ ■
«بعيداً عن السياسة وقرفها.. لواحدة كنت بعرفها»
«للى هيا ما بقتش هيا.. الله يرحم الزمان والمكان واللى كان»
«الله يرحم الرومانسية»
طيارة ريح القمر.. بين النجوم بتطير
عصفورة فوق الشجر.. طايره ورا العصافير
وأنا وإنتى وحبنا.. ورا فرحة قلبنا
ورا حلم السنين.. طايرين طايرين
طايرين طايرين.. طايرييييييييين
بعيد عن المدينة.. وأزمة الإنسان
ودوشة الآلات.. والزحمة والدخان
بعيد عن البشر.. وعن غدر الزمان
جايينلك يا قمر.. بشوق وبحنين
لبكره المختلِف.. يقر ويعترِف
إن إحنا وصلنا ليك.. طايرين طايرين
طايرين طايرين.. طايرييييييييييين
الحب ليه جناحات.. رفرفت بينا
والسعادة ساحات.. فوقها عدينا
وشفنا بقلوبنا وحسينا بعينينا
الحلم أصبح علم.. وأصبح يقيييين
وبكره المختلف.. حييجى ويعترف
إن إحنا ريح القمر.. طايرين طايرين
طايرين طايرين.. طايريييييييييين
«كتبتها من 33 سنة.. ملحوظة: ريح القمر معناها جنب القمر»
(2) احضنينى «نثرية بالعامية المعمية.. اختصرتها قدر المستطاع»
■ ■ ■
«افتكرتها ونشرتها على صفحتى بالفيس فى 14/ 2/2013م.. بمناسبة الفلانتين.. وورود اسمى فى قائمة الاغتيالات التى ضبطت أمس مع خلية مدينة نصر المزعومة.. ههههههههههه.. مش عارف ليه؟! أكيد مش أنا ولا إيه؟!؟!؟!.. http: //www.elwatannews.com/news/details/131277»
«رقم 2 فى الشخصيات الفنية فى ذيل القائمة»
احضنينى الدنيا برد.. احضنينى.. لو حاولوا.. ياخدونى منك.. يخطفونى.. اخطفينى.. اخطفينى من إيديهم.. قبل ما أتنرفز عليهم.. قبل ما.. أهيج وأثور..
وأنا آخر مرة ثُرت فيها.. قاسيت كتييييييييييييييييييير
احضنينى بقلب جامد.. احضنينى بشوق جديد.. اعصرى الكبت اللى راقد.. بين ضلوع من حديد.. اعصرى الضيق الشديد.. اعصرى الحزن اللى سارح فى
الشريان والوريد.. اعصريه واعصرينى وخرجينى
خرجينى م اللى جوه.. دا اللى جوايا بلاوى. واسرقينى من همومى بالحكاوى.. بالهزار.. بالغناوى.. اعمليلى يا إنتى حاوى.. وحسسينى بإنى كائن ليا قيمة.. وإن فيا صفات كتييير.. هايلة وعظيمة.. بإنى ممكن أكون.. رئيس حكومة أو نجم سيما.. بإن فيا.. ما يشد الحواليا.. بإنى بُكره حصبح غنى وأصبح شهير.. بإن مستقبلى.. غير.. مستقبل التعمير.. غير مرتبط بهذا البلد.. اللى الفقير فيها لما اغتنى.. أصبح فقير.. أصبح فقييييييير
حسسينى وبذكاء إنى طلعت فوق خيالِك.. والفلوس اللى تعوزيها صدقينى حديهالِك.. بعدما أبقى مليونيييييييييير..
ملحوظة: فجأة سمعت صوت شخييييير..
«والله العظيم الكلام ده عمره 33 سنة.. ويمكن زيادة»
وكل عام يا فلانتين.. وأنتم دايماً طيبين.
وإلى أن نلتقى مرة أخرى.. دا لو فيه مرة أخرى.. إليكم أطيب أمانى قلبى ودعواته.. وعليكم سلام الله ورحمته وبركاته.