دعاية إنتخابية...لشريف حسين

"الزحمة مش متوقعة"
قالها وهو بيتسم
وبص للجمع الغفير
رغم إنه مش فاهم أوى
كان قلبه حاسس إنه خير
يسأل فيلقى فلان هييجى فى مؤتمر
وفلان ده من بكرة الخلايق كلها
بإشارة منه هتؤتمر
يحضر فلان
أول ما يحضر ينفجر صوت الحناجر بالهتاف
فينقبض قلبة لدقايق بعدها .. يشاورلهم
ويحيىّ كل الموجودين بتحية تشبة للرئيس
يحيي فيهم سعيهم
ويقول بان رهانه كان على وعيهم
كام شاب م اللى استشهدوا
يبدأ كلامه بنعيهم
يسرح بعقله حبتين
ويفتكر إن اللى ماتوا كانوا السبب فى وقوفه ده
فرشوا دماهم لجل يتنصب السرادق للدعاية والوعود
تقطع عليه سرحانه كلمة من منسق حملته
"مين اللى عايز يسألوا"
فيقوم مواطن م المكان
يرفع ايديه ويقول أنا
تقدر بقى تشرح لنا
سبل النهوض الممكنة
فكرك يا ريسنا اللى جى .. ايه العمل؟
واذا كنت هتزين كلامك بالوعود والطنطنة
تملا المسامع بالأمل
تبقى مرشح محتمل !