في بعض الناس، ببقي عايزة أقابل أهلهم وأقول لهم "حرام عليكوا اللي عملتوه في الواد / البنت".. زي إيه؟: 1- زي البنت اللي تبقي واثقة في نفسها ثقة موردتش على حد قبل كده: اللي هما البنات اللي قبل كل جملة يقولوا "لأ، أنا عن نفسي كذه كذه"، "أصل المفروض كذا كذا"، وعمرها ما تعترف بغلطها أبدًا.. أصل ماما حاطة في راس البنت، إنها أحسن بنت في الدنيا وإن أي حد يوجهلها كلمة، لازم يأخذ على دماغه.. دول غالبًا اسم الدلع بتاعهم بيبقي "بنتشي حبيبتشي". 2- العيال اللي بتخاف من الحسد لدرجة تقرف القرف ذات نفسه: أصل ماما بتقولهم "متقوليش لحد"، مرتين في اليوم قبل الغدا وبعده.. اللي هما تلاقيهم أراريب كده ومدكنين على حاجتهم، وعايشين في عالم سري في كل تفاصيل حياتهم، ابتداءً من درجات الامتحانات لحد الجواز، مدكنين إلى الأبد!. 3- الفتايين أو بمعني أصح الفشارين: ودول في أغلب الأحوال بيبقوا طالعين لماما، أصل ماما دمها خفيف موت وفي نص الحكايات اللي بتحكيها، بتحب تحط النكهة الخاصة بتاعتها.. فمفيهاش حاجة لو ألفت تفصيلة أو اتنين يعني، كله لغرض الترفيه وكده، أهو البنت والولد بيطلعوا "تيبيكال". 4- العيال اللي مش سايبة الناس في حالها: ما طبعًا، متوقع إيه من واحد أو واحدة مامتها على طول في البيت ماسكة التليفون بتنم على خلق الله كلهم؟.. "أصل عفاف بنت طنط فيفي اتجوزت علاء ابن أونكل توفيق"، "بس علاء ساب عفاف واتجوز بنت أخت طنط أشكيناز".. واخدين بالكوا؟. 5- العيال المادية "فحت": ودول عادة بيبقوا بنات في السن العسول جدًا، اللي هو سن الجواز والخطوبات والذي منه.. هتعرفها من التعليقات بتوعها على أي موضوع فيه كلمة "جواز".. خذ مثال: - بنت نمرة واحد: مش مرفت اتخطبت. - البنات اللي في القاعدة: يا ألف نهار أبيض. - البنت العسولة: عربيته إيه؟.. عرفتها؟!.
