م الآخر| "المسلمون يمتنعون".. وأشياء أخرى

- "المسلمون يمتنعون".. انتوا دخلتوا الجنة في "دستور 2012" اللي فات، ادوا فرصة لاخواتكم "المسيحيين".. يقولوا نعم عشان يدخلوا الجنة هم كمان.
**
- أحلى حاجة لما صحابك المسلمين يتصلوا يعيدوا عليك ويقولولك كل سنة وانت طيب يا مسيحي يا كافر.. ساعتها بتحس إن الناس دي عيدت عليك وضحت بالجنة عشانك.
**
- الشتا.. أزمة بوتاجاز.. الصيف.. أزمة كهربا.. الصبح.. أزمة مواصلات.. الضهر.. أزمة عيش "مصر.. أزمة قلبية".
**
- لسه بركب التاكسي قالي يا باشا شكلك مسيحي زي.. والله حقنا ضايع في البلد دي وبناخد على قفانا.. أقربها قالولنا صوموا رمضان مع اخواتكم.. وصومنا معاهم وحدة وطنية بقى.. وآديهم فطروا.. تعالى قول لواحد فيهم صوم معانا العدرا وأكلك كله يبقى زيت ولا هيعرفك والله .. لامؤاخذة يا باشا أعطلك هقف ع الناصية أجيب ساندوتشين كبده أنا على لحم بطني من الصبح.. أجبلك معايا واحد سجق؟!.