أحلي قصيدة.. ما اتكتبتش

الي ابني عمر وأصحابه

بقلم بهاء جاهين :
سنة خضرا يا معلم بدرا العدرا تجلت في الحضرة كل مبادرة تبدر بدرة دش دهب نازل بالقدرة يملا ستاد مختار التتش أحلي قصيدة ما اتكتبتش أرواح خضرا ماكتأبتش وما اكتسبتش سمات شيخوخة التين بيصبح ع الخوخة ح تقول لي شتا لأ يا صديقي
أرواح الأمة ماشتتش
أرواح الفاكهة ماشتتش
وطيور البهجة ف أغصانها
من غاز الشرطة ماشتتش
أحلي كلام قلناه من مدة
والأحلي كلمة ماخطرتش
دنيا خطر, وقلوبنا الشابة
قالت لأ, دنيا ماخطرتش
واللي انتصرت أول مرة
عمرها ما تكون ما انتصرتش
واللي قلوبهم كاوتشوكي
طول عمرها ستظل كاوتش
حزر فزر جيبي اتفزر
عن فوازير سهلة وبتهزر
أحلي قصيدة اتكتبت دخلت
مفرمة طلعت منها سكتش
بس الشاعر علشان واعر
جاهر بالشعر وما سكتش
ألف قصيدة ف عالم عيضة
وأماني بعيدة ماهمدتش
ح تقول لي دي قصيدة جديدة
راح اقول لك دي نهاية سعيدة
في رواية لسه ما حصلتش
وحكاية أصلا مش حاصلة
تاهت في مواصلة ما وصلتش
وأغاني من أول وصلة
بيطفوا عليها الأنوار
وقلوب نورانية ومتصلة
قضبان عازلاها وأسوار
وإيمان مهما يمهمطوا توبه
عمره ما يفارق مكتوبه
وعجوز يتدلدق مشروبه
يلسع حجره يرجع شب
ويفز يقول أنا جبار
وعيال تتفرق بعصاية
بعد شوية ترجع شعب
مش هايب ألعاب النار
وقصيدة ركيكة ف أولها
بعد شوية تبقي وصاية
وتخش ديوان الأشعار
وخصوصا إذا كانت لسه
ما اتسمعتش وما اتعرفتش
يعني سطورها اللي ح توجعهم
لسه بشوكها ما اتشطبتش
أشهي برقوقة في منابنا
لسه علي غصنها ما طابتش
احموها دا انتوا يا شبابنا
فاكهة ربيعية ما حصلتش
لا يخطفها غراب البين
قلب وقلب ما هوش قلبين
أنا وانت اتنين بس قلوبنا
خلق بتحلم.. بالملايين