م الآخر| كل خروجة هي أول خروجة

شباب وبنات كتير بيكونوا حاسين إن كل ميعاد بينهم هو أول ميعاد. وبيكونوا محتارين:
الولد:
- ألبس إيه؟
- أعزمها فين؟
- طيب كل مرة أجيب ورد؟ ولا هتزهق منه؟
- أسألها تحب تروح فين ولا هتقول عني جاهل في الأماكن واتحرج؟!
- طيب أروحها ولا أسيبها تروح لوحدها عشان محرجهاش؟
البنت:
- أحط ميكاب ولا اظهر ع طبيعتى عشان يشوف شكلي الحقيقي؟
- أجيبله مرة هدية؟ ولا أبان رزينة أحسن؟
- أقترح عليه أماكن بحبها ولا أرضى باختياره؟
كل دي أسئلة محيرة جدا لأي ولد وبنت وممكن تخليهم يأجلوا خروجهات كتير بسببها، لأن في ناس فعلا قلقوقة (ومحنتفة) اللي بنقول عليهم موسوسين.
كل ده حله بسيط جدا، اتصرف بطبيعتك مع مراعاتك للإتيكيت الذوق العام، يعني:
في أي خروجة بينكوا دايما فكر ورتب ليها من قبلها هل هيكون هادي (مطعم، كافيه، حفلة هادية)، ولا خروجة (الهرم، حفلة باند)، يعني شوية تنطيط. المكان الهادي البس فيه (simi formal) يعني ممكن بنطلون لطيف وعليه بلوفر كلاسيك أو قميص، وإنتي ممكن تايير لطيف أو فستان أو بنطلون وبلوزة وركزي على ألوان بنتوتيه مش قوية أوي. "لسبب" إن المكان الهادي في الوهلة الأولى هيلفت نظركوا وهيعجبكوا لكن باقي الوقت هيكون نظركوا متركز على بعض. شكلكوا كلامكوا نظراتكوا إلخ، فضروري إن اللى قدامك يكون مرتاح في النظر ليك، نبعد عن الألوان المشعة الفسفوري، وأي لون فاقع، لكن لو حفلة لباند أو خروجة فيها جري أو مشي كتير، البس كاجوال يريحك في الحركة.
بالنسبة للعزومة: وانتوا بترتبولها اسألها هل في مكان معين بتحبيه؟ لو اقترحت أماكن بينك وبين نفسك فكر أيهم أنسب ليك ارتياحا ثانيا ماديا، لإن أحيانا بيكون في مواقف محرجة إن أثناء وجود الاتنين في كافيه واخدوا راحتهم في الطلبات، الشيك بيجي أوفر شوية، وبيكون الشاب محرج، خدها قاعدة طالما قررت تخرج لازم يكون معاك مبلغ كويس للمكان اللي هتتواجد فيه، ي ناس هتقول طيب لو المكان جديد ومعرفش أسعاره، (هقولك) اعمل سيرش عليه واعرف رقمه وعنوانه وروح اسأل على أسعاره وشوف المنيو، وتكون حركة ولافته لطيفة جدا لو حجزت فعليا ترابيزة ليكوا، تفاجئها إنك رتبت للميعاد مسبقا في المكان اللي اخترته، والنتيجة (هتدعيلي)، المكان بالمشورة والتفضيل بينكوا، مش فرض رأي.
بالنسبة للهدية: بتكون على حسب مكان الخروجة (وأهم شئ عدم التكرار)، مينفعش نروح الهرم ونركب خيل وأجيبلك ورد.. حتما هيتبهدل. لو رايح مكان فيه تنطيط أو حفلة ممكن تهاديها بحاجة شخصية (سكارف أو سلسلة فضة رقيقة) والأفضل إنك تبعد عن أي شئ في الملابس والنضارات لإنها لازم تختار وتقيس منعا للإحراج فقط، لو المكان هادي (هاتلها سلسلة، خاتم رقيق، أو أي هدية مبتكرة ع ذوقك)، وحاول أحيانا تكتب كلام ع الهدية يرتبط بيك مع الوقت معاها بعد كده.
إنتي ممكن تهاديه (بكوفية أو برفان حلو وشيك، ساعة، إلخ)، أهم حاجة اهتمي بشكل الهدية نفسها، أكتر من اللف أو البوكس لأن الولد بيهمه إنه يقتني شئ شكله حلو ومختلف.
(هنكمل المرة الجاية)