م الآخر| رسالة من قرية ديك

من فرد من أرض الغلابة الثايرة
حيث العمل والسواقي الدايرة
بعد السلام والرجاء والتعميمة
بطلب بحق الأدان والترنيمة
الاهتمام بكلامي المُرفق
وفي الدماغ مضمونه يلزق
أنا طلبه من قرية ديك
قرية ديك أم القرى
اللي حاكمها عمدة عاديك
آخر ظلم وآخر افترى
قصره يا خويا اسم الله عليك
فيه ملايينه المتلتلة
غير عقارات وبنوك وناهيك
عن حساباته اللي ف دِرا
غير غفره أرباب كرابيج
غير أسراه اللي مسلسله
غير أطيان وآلاف فدادين
والنساوين المتسربلة
عينك ما تشوف النور
م الأبواب المتقفلة
المهم..
إحنا سمعنا من فترة
عن حركة ستة أبريل
والإخوان أنصار السنة
وجماعة لجل التغيير
وياما بعتنا تلغراف
للجماعات الدوقروماطية
وبعتنا جواب استعطاف
لفضيلة المفتي أبو طاقية
وسئلنا ف كل الأعراف
والأديان ما لاقينا وصية
بتقول الحاكم عجراف
والمحكوم محكوم بقسية
اللي حصل بقى..
قوم ماسكتتش الناس الحرة
كانوا عايزين حبة تغيير
راحوا شباب القرية الطاهرة
قاموا نازلين عند التحرير
قام العمدة شاف الثورة
قالك لأ ده أنا لازم أطير
الناس هتخلص تدَّور
تيجي عندي وأنا حملي كبير
قطع العمدة وقطعت سيرته
أهو غار برضه ومغرش
لسه قاعدلنا قبيلته
وكأنه موجود ولا غابش
لسه حدانا الناس ف القرية
تدفع رشوة لجل سماد
ولجل ما ياكلوا العيش يتذلوا
من فران اسمه حماد
ما تنضفها يا عم الجيش
ولا هو المجلس مات؟
هينضفها العمدة القادم
ولا مرشح الانتخابات؟
مش محتاجة مجلس حاسم
ولا عايزة لجنة سياسات
عايزة الناس تنضف من جوه
ومن بره ونعد عتاد
ولا خلاص هي الولَّادة
عقمت عن إنجاب أولاد؟
في نهاية مرسالي أنا بشكر
ولا هشكر ولا همدح حتى
أنا بطلب مش عايز نصبر
ولا نستنى يا عالم حتى
يحكمنا من تاني العمدة
بالكرباج والسوط ندفى
أنا اسمي طلبه صِدِّيق.. والمسكن أهو قرية ديك
المُرسل إليه: كل من رفع شعارًا قائلًا فيه بكرة أحلى
المُرسل: إحنا كمان عاوزينها أحلى ....
متسربلة: ترتدي قمصانا.. السرابيل: القمصان