قاطع الرئيس عبدالفتاح السيسي، اللواء عاصم عبدالله شكر مدير إدارة المياه في القوات المسلحة، خلال حديثه عن مشروعات المياه، قائلا: "كنا اتكلمنا عن محطة الجلالة وقولتلكم خليكم مع رجال الصناعة في مصر". وخاطب السيسي اللواء كامل الوزير رئيس الهيئة الهندسية للقوات المسلحة، "يا كامل رجال الصناعة في مصر والقائمين على العمل، علشان نعظم المكون المحلي، ما دام إحنا داخلين في برنامج ضخم بالمستوى ده، وبما إننا بنعمل محطات بحجم كبير كدا، قولت خشوا مع رجال الصناعة، ومع الشركات اللي بتنفذ المشروع علشان نعظم المكون المحلي.. عملتم إيه يا كامل؟". ورد الوزير: "الفلاتر تنشأ عندنا، والأغشية فقط يتم التنسيق مع الهيئة العربية للتصنيع من أجل عمل مصنع أغشية في مصر"، ورد السيسي: "أنا بقولكم كده علشان ده مجال هنتوسع فيه ال10 سنين الجايين، ولا بد يكون عندنا حاجتنا ونشغل الناس، ده اللي قولناه يا عاصم؟". ورد اللواء عاصم: "أنا جبت كوريين يا فندم وإن شاء الله مصنع LG جايلنا على آخر الشهر"، ورد السيسي مستنكرا: "يا نهار أبيض"، وتدخل اللواء كامل الوزير: "هنجيب أكتر من مصدر والهيئة العربية للتصنيع جاهزة". قال السيسي: "أنا بقول الكلام ده علشان كل رجال الصناعة في مصر يعرفوا إن فيه فرص كتير جدا لعمل وصناعة منتجات محتاجينها في الخطة اللي مصر شغالة فيها، لكن لما نيجي نتكلم في حاجات كتير جدا ممكن تكون بتتجاب ممكن الخارج، وقولتلك يا كامل هات رجال الصناعة وقول عاوزين ده وده وده بالكميات دي خلال ال10 سنين الجايين، بحيث يكونوا عارفين إن استثمارتهم هتعود ليهم مرة تانية". ورد الوزير: "هنعمل مصنعين كبار واحد للأسانسرات، والتكييفات وغيرها". ويفتتح الرئيس عبد الفتاح السيسي، اليوم، عددًا من المشروعات التنموية في مقدمتها محطة معالجة الصرف الصحي بالجبل الأصفر، ومشروع "المحروسة 1"، الذي يعد أحد مشروعات تطوير العشوائيات ويقع بمدينة النهضة بحي السلام بمحافظة القاهرة، تمهيدًا لإعلان مصر خالية من العشوائيات. ويضم "المحروسة 1" مشروع نحو 4900 وحدة سكنية، وعددًا من المحال والمكاتب والوحدات الإدارية في المشروع، لخدمة سكان المناطق العشوائية غير الآمنة، وتبلغ المساحة المخصصة للمشروع نحو 60 فدانًا، منها 37.4 فدان مخصصة للعمارات، و14.2 فدان مخصصة للخدمات، و8.4 فدان مخصصة للطرق وممرات المشاة، بجانب 2.7 فدان للمناطق الخضراء والفراغات العامة.
