قبل ما أكتب جه على بالي فجأة سؤال.. بس مُلح لية انا بكتب عنك إنتي؟؟ رغم كل مافايض فيكي.. عندي يشح ويبقى مفيش لية مُصر اني أعيش؟؟ وانتي عايشة جوه مني لية كتابتي تنادي قلبك؟؟ رغم إنك كاسرة قلبي ماصة دمي لية بحبك غصب عني؟؟ كل حلم في يوم حلمته لية لقيتك جوه منه؟؟ ساكنة فيه كل شعر في يوم كتبته لية لقيت اسمك عليه كل صورة من حياتي ويا أمي ولا ابويا كل لعبة لعبتها ويا صاحبي ولا اخويا كنت دايما ليه معانا؟؟ قولي ليه؟؟.. دمعة نزلت من عيوني رعشة مسكت في إيديا والقلم م الحزن شطب والنسيم قرب عليا جه وهفهف قاللي إفهم قاللي إعرف قبل ما تكتب كلامك.. طير ورفرف بص شوف.. هي إية؟؟.. ولا مين؟؟ غير غلابة وطيبين هي ست عجوز بتضحك لابسة توب أسمر حزين هي مين؟؟.. ولا إية ؟؟ هي رسمة عالخريطة ولا عسكري بشريطة هي حاجة صعبة مرة ولا طيبة وبسيطة هي مصر قريبة منك ولا مصر غريبة عنك هي مصر مرات أبوك ولا مصر بجد أمك ................. جت إجابتي في جملة واحدة ليكي هاكتب والسلام دا أنا سامعك زي غنوة دا أنا شايفك بنت حلوة ومهما تيجي الريح تهزك ولا تلقي ألف نوة مستحيل يامصر اشوفك سجن وعساكر نظام