مبارك.. و«راموش» (5)

كاد «راموش» يفقد أعصابه.. غير أنه تذكر أن دستور الجن يفرض عليه احترام السيد الذى أخرجه من المصباح وطاعته.. نظر إلى «مبارك» باستعطاف «يا سيدى.. أنا مش عايز فتة ولا لحمة ضانى.. خلّصنى وكمل طلباتك.. أنا نفسى أخلّص المصلحة معاك وأرجع لأطلب العفو من ملك الجان».. ضحك «مبارك»، وبادره: حاضر يا راموش.. خلى بالك يمكن ترجع تلاقيهم عملوا ثورة على الملك بتاعك.. إلا بالمناسبة يا عفريت أنتم عندكم ميدان تحرير زينا؟!
نظر «راموش» إلى سقف الغرفة، قائلاً: «يا رب ارحمنى.. عمرى ما شفت بنى آدم كده».. ثم أردف هامساً: «والله عندهم حق إنهم خلعوك».. سأله مبارك بحدة «إنت بتبرطم بإيه يا راموش.. تحب أرجعك المصباح تانى.. إنت عارف إنى غتيت وأعملها».. أجابه «راموش» بلهجة يملأها الرعب «عفواً سيدى.. عارف طبعاً إنك تعمل أبوها.. ده إنت حتى ممكن ترجعنى بطن أمى لو قدرت.. أرجوك العفو يا سيدى».. وضع مبارك قدماً على قدم، وقال: «خلاص ياعم عفوْت عنك.. تصدق يا راموش إنى نفسى أحتفظ بك عندى هنا فى شرم.. أنا خلاص بقيت فاضى.. وممكن تسلينى وألعب بك بدل الطاولة.. حاكم صاحبى وأخويا حسين سالم هرب وسابنى.. كنا بنقعد مع بعض نلعب طاولة بالساعات.. ومفيش مانع نخلّص شوية بيزنس على الماشى.. أنت عارف يابوالعفاريت.. كنت بكسب سالم دايماً.. هوه طبعاً كان بيتغلبلى عشان أموره تمشى.. تصدق إنى قعدت أغلبه سنة كاملة بعد توقيع عقد تصدير الغاز لإسرائيل.. خلى بالك سنة قليل.. دى سبوبة الغاز دى كانت مليارات.. يا ابن الجنيّة يا سالم.. أخذ كل حاجة وقال يا فكيك.. عموماً ربنا موجود»!
نفخ «راموش» بغضب وقال «فعلاً ربنا موجود.. ربنا على الظالم والغتيت والرخم والغبى كمان».. سأله مبارك بحدة مرة أخرى «تقصد مين يا واد».. ارتعد راموش قائلاً: «أقصد حسين سالم طبعاً يا سيدى.. بقولك إيه ما تدخل بقه على طلباتك.. عايز إيه من الإخوان»؟!
«آه.. عندك حق.. ندخل على الشغل».. قال مبارك، ثم استطرد: أنا حكيت لك عن طبيعة الإخوان.. دول ناس زينا بالضبط؛ كل هدفهم السلطة والجاه وكرسى الحكم.. وهمّ دايماً مستعدين يعملوا أى حاجة لتحقيق مصالحهم وأهدافهم.. علشان كده عايزهم يلهثوا بكل قوة نحو السلطة.. عايزهم يستعجلوا قوى.. عارف حكاية الشبع بعد الجوع.. شهوة الحكم والنفوذ والنهم فى المغانم.. نفسى ينعزلوا عن شباب التحرير، ويعملوا أجندتهم الخاصة.. يناوروا، ويعقدوا صفقات ويرجعوا ينقضوها.. عايزهم يعملوا صفقة سريعة مع المجلس العسكرى.. وأنا عارف إن المجلس هيصدقهم، لأن خبرته فى السياسة ضعيفة.. وبعدين الإخوان يحصلوا على المكاسب، ثم ينقلبوا على المجلس والبلد كلها.. يخطفوا مجلس الشعب بالزيت والسكر واللحمة.. همّ أساتذة فى استقطاب الفقراء والجهلاء.. وبعدين يطلبوا الحكومة.. يقولوا كلام، وينفذوا عكسه، وفى الآخر ينزلوا بمرشح رئاسى!
يا راموش.. الإخوان همّ الضمانة الأساسية لإشعال البلد، ومعاهم طبعاً أخطاء المجلس العسكرى اللى طلبتها منك.. الاتنين لازم يرجعوا بالأوضاع للخلف.. لازم ينقلبوا على الثورة.. الإخوان والمجلس العسكرى لازم يكونوا ثورة مضادة.. يخلوا الناس تكره الشباب اللى بهدلونى، وتكره ميدان التحرير وكل ميادين مصر.. عايز الإخوان يلعبوا على كل الحبال، يلعبوا مع قطر والسعودية وتركيا وحماس وحزب الله.. عايز قيادات الإرشاد كل يوم فى زيارات للدوحة، وأنا عارف الجماعة بتوع قطر هيعملوا إيه.. نفسى يا راموش «الإخوان» يجيلهم انتفاخ وغطرسة القوة، ويتصرفوا فى كل حاجة على الأساس ده!
صمت مبارك قليلاً، ثم قال: «بمناسبة الانتفاخ يا راموش.. تشرب سفن آب»؟!