كان على عينى يا حودة (4)

أوقات وأنا ماشى لوحدى، يكر فى دماغى الشريط:
حتسألنى سيادتك:
- شريط إيه يا هذا؟
- حاقول لك!
شريط الذكريات وصدقنى العبارة دى حقيقية، ميه الميه، لأنى وأنا فى طريقى من حوش آدم لوسط البلد، كر الشريط فى دماغى إذ فجأةً: «الفقرا حيعشقوك والشعرا حيكرهوك»، العبارة دى قالها لى الأستاذ محمد المصرى، الله يمسيه بكل خير إذا كان لسه عايش أو يرحمه ويبشبش الطوبة اللى تحت رأسه إذا كان توكل على الله ومات، وقالها وهو ميت على روحه من الضحك بعد ما سمّعته قصيدة كلب الست، وإحنا قاعدين فى مكتبه فى منظمة التضامن الأفروآسيوى اللى كان فاتحها المرحوم يوسف السباعى فى شارع عبدالعزيز آل سعود فى منيل الروضة.
- فاتحها ليه؟
- ح أقول لك.
- الله أعلم.
ويمكن الإجابة على السؤال ده تكون هى اللى صبحوا فى ذات يوم لقيوها مكتوبة على باب قصر الأميرة عين الحياة -سابقاً- اللى أصبح بفضل الله وبقدرة قادر منظمة تضامن الشعوب الأفريقية الآسيوية- وكانت مكتوبة بخط نسخ جميل: «مزرعة السباعى لتربية المواشى!» مين اللى كتبها؟ الله أعلم، طب مين اللى علقها؟ برضو الله أعلم، يومها بص لى الأستاذ محمد المصرى من خلال دموع الضحك اللى ملت عينيه وقال لى:
إنت هتبقى شاعر واعر، بس اعمل حسابك الفقرا، هايعشقوك والشعرا حيكرهوك.
ثم ردد وهو يضحك بشكل هستيرى:
هيص يا كلب الست هيص
لك مجامل فى البوليس.
بكرة تتولى فى وزارة
للكلاب ياخدوك رئيس
***
يا ابن الكااالب دا أنت هتاكل ضرب ماكلهوش حمار فى مطلع، سايب كل الحيطان الواطية اللى مالية البلد وما نشنشت إلا على أعلى حيطة فيكى يا مصر، وبعد كده متصور إنك حتعيش فى أمان زى بقية خلق الله؟ ياض دا إيه ده دانت كده حكمت على نفسك بتعب القلب يعنى تأبيده، ثم إنت مال أمك ومال إسماعيل اللى عطف عليه كلب الست وعضه ودخله التاريخ من أوسع أبوابه، عاملى فيها محامى الغلابة والمساكين؟ طب استعد بقى للى حيجرالك يا كلب يا ابن الكلب، وأوعى تفكر إن كل الكلاب زى بعض.
قلت له:
يعنى إيه مش فاهم؟
قال لى:
ولا حتفهم طول عمرك يا ابنى يا غبى، كلب الست ده من الكلاب المرخصة، يعنى إيه مرخصة؟ يعنى الدولة معترفة بيهم، إنما أنا وإنت كلاب سكك، يعنى ما لناش متوى كلاب ضالة مالهاش صاحب يبقى إزاى يا كلب يا ابن الكلب تعمل راسك برأس كلب الست أم كلثوم؟
قلت له:
بس أنا ما شتمتش كلب الست، دنا كل اللى عملته إنى حكيت حكايا حصلت بالفعل على أرض مصر المحروسة، إيه الجريمة فى كده؟