حد يعرف مصر؟

نشرت هذا المقال بتاريخ 16 أكتوبر الماضى.. وأعيد نشره اليوم..
هى مصر فين؟ ولا مصر أصلاً مين؟ مصر الكرامة والأرض؟ ولا مصر الهوان والعرض؟ مصر الأمانة ولا مصر الخيانة والحياة وسط الجحيم؟ مصر الحريم؟
مصر رجالة بحق وحقيق؟ مصر الطفل البرىء؟ ولا مصر العيال السيس والواد الخنيق؟
مصر التمام والكمال؟ مصر الجمال؟ مصر الجدعنة؟ ولا مصر الخضار اللى مروى بمية مجارى منتنة؟ مصر انت.. ولا أنا؟
مصر الطفاسة والمياصة؟ مصر واحدة بتشتغل فى شارع الهرم رقاصة؟ مصر اللى تندب فى عين اللى يكرهها رصاصة؟ مصر اللى كانت «نوجة» وأصبحت «مصاصة»؟
مصر اللى فى القرآن.. مصر اللى خانقانا بحنان.. مصر اللى نسيت اللى جاى وعايشة فى اللى كان؟
مصر اللى فى الإنجيل؟ مصر الحُما فى النيل؟ مصر اللى صبح تقلها فى المنطقة برميل؟
مصر الحلاوة الشعر؟ مصر اللى هربت من بحور الشعر؟
مصر العروسة اللى رافضة المهر؟ مصر القهر؟
مصر البيبان المتقفلة؟ مصر الساندويتش اللى باقى فى «فلفلة»؟ مصر اللى كانت عظيمة ولسة عظيمة رغم انها متبهدلة؟ مصر المتقندلة؟
مصر اللى باصّة فى السما؟ مصر العما؟
مصر اللى ديكها طالع، بيدّن وقالع، ولا حد سامع، ولا حد يصحى بصوت أدانه؟
مصر اللى حاشت عنه صوته وسابت ودانه؟
مصر القمر والليل طويل.. مصر الصوات وانتصار العويل.. مصر اللى سايبة البلاى استيشن ولسه بتلعب المنديل؟
مصر البونيّة فى وشك ليلاتى.. مصر اللى هى مراتى وفى نفس ذات الوقت حماتى.. مصر اللى كانت متعودة دايماً.. تاكل حمير من عند رزق الحاتى؟
مصر اللى هى الشاى فى الكوباية القزاز على قهوة بلدى كراسيها برة؟ مصر اللى رغم السكر ده كله تدوقها يوماتى تلاقيها.. مُرَّة؟
مصر المحبة والغرام.. مصر الحلال رغم إن كل اللى بيحصل معاها ومنها حرام؟
مصر اللى صلى وصام وقام الليل وكبر.. مصر يا ابنى منها «كبَّر»؟
مصر عبر بس استلقى.. مصر آااااه وبلاها لأه؟
مصر هأة وضحكة صافية.. مصر كل ما فيها مافيا؟
مصر حاسب تبقى منها أو عليها وخش فيها وروح داريها لتفضحك؟
مصر اللى كل يوم بتحب فيها وتجرحك؟
مصر اللى كانت حاجة حلوة تفرحك؟ مصر اللى سايباك لسة قاعد مطرحك؟
مصر صافى يا لبن.. قشطة وحليب؟ مصر اللى رافضة ترفع عنك التعذيب؟
مصر اللى مكفرالك سيئاتك.. وإن هاجرت يا ابنى منها تبقى أكبر إنجازاتك؟
مصر اللى اوعى تسيبها لكلاب السكك، وانهش نصيبك من فسادها لتقلبك، واوعى فى يوم تصبح بطل لتقلِّبك؟
مصر نقطة نور آخر طريق ضلمته عامية الجميع؟
مصر الدين اللى لله بس الوطن عمره ما كان للجميع؟