يا بديع.. حوش صاحبك عنها!

يا شيخ بديع.. يا «إخوان المجرمين» غلب حمارنا معاكم، ونشف ريقنا بكل اللغات والأساليب الراقية ولم تفهمونا.. اليوم قررنا أن نكتب لكم بلغتكم.. لغة عشيرتكم.. لغة «الزنجة - زنجة»، فاعذرونا!!
شوف يا حاج بديع.. لازم تفهموا إن «ماحدش يقدر يتحرش بأم الدنيا».. فاكر يا بديع زمان.. أى عيل يعاكس بنت كان العسكرى يمسكه ويحلق له شعره على الزيرو، ولو اتمسك تانى يتسجن!!
النهاردة «صاحبك» أبودقن بيتحرش ب«أم الدنيا»، شُفت عمرك واحد بيتحرش بأمه؟ مرة ب«الفنجرز» يعنى بصوابعه، ومرة بإيديه اللى تتقطع، ومرة فى الحارة المزنوقة، ومرة يلعب فى السوستة، لغاية ما وصلت بيه البجاحة وقلة الأدب إنه فى ليلة سودا حاول «يغتصبها» بإعلان منكوب، مخالف للعقد والشرع والدين، و«المحروسة» علشان محترمة وبنت ناس وحسب ونسب نبّهته وحذرته ميت مرة لغاية ما قرفت منه، وبدأت تجرّسه وتمسخره، وسابت عيالها كل ليلة وكل يوم يهزّأوه ويتريقوا عليه ويمسحوا بيه البلاط، يمكن يفهم ويعقل ويعرف أن الله حق وأن الوطن أمانة فى إيده، ومش عزبة وتكيّة لأهله وعشيرته!!
وكان رده: أنا جلدى تخين، وسمعى تقيل، وورايا بلطجية وحمساوية، والكرسى خلاص لزق فيّا واضربوا دماغكم فى الحيط!!
يا حاج بديع.. يرضيك كده يا راجل يا بتاع ربنا يا بوزبيبة إن «المحروسة» هجرته من 6 أشهر وطالبة تخلعه بعد استحالة العشرة زى الشرع ما بيقول، وهو يعاند ومش عامل حساب لأى حد من ولادها ال89٫5 مليون (سيبك من النص مليون خروف)!!
وإيه رأيك فى راجل مجوّع أهل بيته، ومضلّمها فى وشّهم، وبينكّد عليهم مسا وصباح، وبيعايرهم ويلقّح عليهم فى الرايحة والجاية و99٪ من كلامه كدب، 100٪ من وعوده أونطة وكل تصريحاته هجص، وكل تصرفاته تجنن وتخليك تشك فى مصريته ووطنيته.. فى السودان يقطع حتة من لحم «المحروسة» حلايب وشلاتين.. يروح غزة عند عشيرته يوعدهم بأرض الفيروز.. يروح عند «موزة» يسيب قناة السويس.. يزور تركيا يقول لهم: المحروسة كلها فاترينة لمنسوجاتكم وجزمكم.. يبعت لإسرائيل موافقة على كل اللى رفضه المخلوع الأول.. يسافر إثيوبيا يطمّنهم ويشجعهم على سد نهضتهم.. وإحنا يا بديع نعطش - نجوع - نهاجر - نتذل - نموت فى 60 داهية لا شايفنا ولا حاسس بينا ولا معبّرنا ولا معترف بينا أصلاً!
طيب إيه رأيك يا مرشدهم فى الست اللى جوزها بيخونها ويجوّعها ويمسخرها كل يوم قدام جيرانها ومش عايز يطلّقها، وتكتشف بالصدفة إنه ماشى على حل شعره، رغم أنه كل ما يروح فى بلاد برة يتهزأ ويقعّدوه فى الصف الخامس، وفاتح صدره علينا بس وبيدوس بجزمته على القانون المصرى بس، والمدهش أنه بيقبض فى الشهر قد الرئيس أوباما مرة ونص «أساسى + بدلات + حوافز + جلسات + سفريات + مصاريف جيب + شهرية نياشين أعطاها لنفسه وكأنه قائد لحرب 73 ومش مكسوف»!! تقعد الست تسأل نفسها: يكون المنحوس أذكى وبيحقق نتايج مرة ونُص على أوباما - ولاّ يكون المواطن المصرى بيقبض مرة ونص المواطن الأمريكانى؟
ولاّ يكون المتعوس عنده ورث من المرحوم جده الباشا محمد الأول وخبّاه عنها؟ حاجة تجنن لما تشوف ضرتها رايحة «الزجازيج» تزور «جرايبها» بمرسيدس ودفع رباعى، وحراسات وإسعاف، والفلاحين الغلابة قاعدين يتفرجوا ويمصمصوا شفايفهم ويترحموا على أيام التوك توك والميكروباظ والبيجو ال7 راكب!!
والشباب العاطل يطلع يهتف ويندد ويتمرد، والننوس المحروس بتاع هقلّعك الميرى وقعّدك جنب أمك يطلّع لهم لسانه من البلكونة، وبالفنجر الأوسط يقول: خلّيهم يتشلوا!!
يا حاج بديع «المحروسة» بترقع بالصوت وولادها اللى من طينها وشربوا من نيلها وبيعشقوها وعمرهم ما قالوا طظ فيها بيقولوا لك «فاض الكيل»، اخلعوا، غوروا فى داهية، خلاص اتخنقنا، قرفنا، نفسنا اتسدّت وبقينا نتشاءم من وشوشكم، ومن النحس بتاعكم، الناس خلاص كفرت وطهقت، وروحهم بقت فى مناخيرهم، وكلها كام يوم وهيطلعوا يطاردوكم زنجة زنجة، كما جاء بالحلم، (اقرأ على النت سلسلة ليلة القبض على مرسى)، يمكن تلحقوا نفسكم وتفهموا إيه اللى هيجرالكم بعد كل التفعيص والدهوسة واللغوصة والقلاطة والجهل والبدائية وفكر الفقر وفقر الفكر الفاضح - الفاقع المستفز!!
تصدّق بالله يا برنس: أنا كنت قبل الثورة فاكر إنك راجل طيب حتى بمشروعك للخلافة «الاستسلامية» اللى عمرك ما قلت لنا هيه شكلها إيه ولونها إيه وطعمها إيه؟ والخلافة البدنجانية دى هتزرعها بكام والتمويل منين، وهتاخد كام قرن لغاية ما تطرح بدنجان؟ ويا ترى هتزرعوا أى صنف وأى نوع.. إيرانى ولاّ جهادى ولاّ إخوانى.. حنبلى ولاّ حنفى، ولاّ قطبى، ولاّ باكستانى، ولاّ أفغانستانى.. وده هيبقى لونه إيه؟ أسود للمخلل، ولاّ أبيض للمحشى، ولاّ عروس ناكله حاف ويوجع بطننا، ولاّ نوع هجين قطرى على تركى بيتقلى من غير زيت؟ وهل كل الأنواع للأكل بس؟
يا عم الدكتور ما تخليك أحسن فى عالم «الحيوان والبيطرة» بتاعك يمكن تعرف تعالج القرود علشان القرداتى بتاعك يلاقى شغلانة بعد ما يتكل على الله أو تعالج طائر النهضة بتاعكم بعد 11 شهر من العنوسة.. دا إحنا كان عندنا جاموسة فى ال 11 شهر دول ولدت عجلين، ومعزة جابت دكرين، ونعجة جابت 4 خرفان، وانت بسلامتك وعلمك وبركتك وعشيرتك وتنظيماتك مش قادر تخليه يبيض ولو بيضتين؟
يبقى حضرتك عاجز، ومن حقنا نجرّسك ونقول: الصراحة راحة وانت ما بتعرفش واركن على جنب!! وعشان كده كل المصريين هينزلوا يوم 30 بالملايين يرقعوا بالصوت الحيانى ويهتفوا: يسقط يسقط حكم المرشد.. يسقط يسقط محمد مرسى.. لتحيا مصر.
ملحوظة: بعيداً عن هؤلاء المهاويس ووزير السخافة بتاعهم:
1- تحية لكل فنان وأديب ومثقف ومبدع ومبتكر وخلاق يعتكف بدار الأوبرا حفاظاً على هويتنا المصرية ضد كل جاهل يحاول تجريفها أو طمسها أو العبث بها، ونقول لهم: أنتم شموع الوطن ولن يستطيع أى سفيه أن يطفئ نوركم أو يقزّم دوركم.
2- تعظيم سلام لكل قضاة مصر ونياباتها الذين يقفون الآن وقفة رجل واحد لحماية دولة القانون وحقوق كل إنسان على أرض مصر الطيبة. نناشدكم التضامن مع كل الشباب الثورى ضد القضايا الملفّقة والاتهامات الباطلة لهذا النظام المستبد الفاشى الذى لن يتردد فى أى عمل غير قانونى وغير أخلاقى ضد المصريين هذا الشهر بالذات قبل تشييعه إلى مزبلة التاريخ!!
3- يا أحزاب مصر، ويا مرشحى الرئاسة، ويا كل الشخصيات الوطنية.. أرجوكم فكّروا وخططوا لما بعد مرسى وماذا نحن فاعلون لمواجهة «الخرابة» والكوارث والخوازيق التى سيتركها عند رحيله. مطلوب «ماستر بلان» لمصر التى نحلم بها، ومطلوب 30 - 40 مليار دولار من أول يوم بعد جنازته!! وعلى الجيش والشرطة الاستعداد لمواجهة أى اعتداءات أو تفجيرات إرهابية - حمساوية - جهادية - عشوائية - أو أى عصابة بلطجية لأننا ننادى بمظاهرات سلمية 100٪!!