بالفيديو| مؤسسة "ست الحيطة": هدفنا توسيع دور فن "الشارع" في مناقشة قضايا المرأة

في القاهرة.. الناس زعلت عشان مبنرسمش جرافيتي ضد "مرسي"

بدأت فكرة مشروعهم عندما فكرت الصحفية والمصورة السويدية "ميا جريندايزل" في عمل مشروع جرافيتي، وفن شارع مختلف يناقش قضايا المرأة، واشتركت هي وصديقتها "إنجي بلاطة" في البحث عن فريق يساعدهم في تنفيذ مشروعهم، فبدأوا ب 25 رسام جرافيتي من أربع مدن مصرية هي: المنصورة، والإسكندرية، والقاهرة والأقصر، لرسم جداريات مشروع "ست الحيطة"، مشروع الجرافيتي الهادف لمناقشة القضايا المتعلقة بالمرأة.
المشروع، كما تقول مؤسسته إنجي بلاطة، وسيلة مهمة "للكلام مع الناس وتبادل الأفكار، وزيادة دور فن الشارع في مناقشة مثل هذه القضايا، كمان وسّعنا نشاطنا بره الجرافيتي للمزيكا، جبنا ناس تلعب مزيكا؛ دعما لمشروعنا في يوم ختام المشروع"، وأضافت بلاطة "بدأ المشروع كفكرة في ديسمبر الماضي، وتكلمنا مع كل اللي نعرفهم من فنانين الجرافيتي، عشان نبدأ نشتغل على مشروعنا، وتحمس لنا ناس كتير".
المشروع بدأ ب 25 فنان جرافيتي، "بعدها العدد زاد في وقت صغير، ووصل لأكثر من 60 فنانا، حاولنا نركز أن يبقى في الفريق فنانات جرافيتي، مش عشان نقول إن الست أفضل من الراجل أو في صراع معاه والحاجات دي، لكن الست مظلومة حتى في فن الجرافيتي، على الرغم إن فيه فنانات جرافيتي مبدعات جداً".
رد فعل الشارع على جداريات "ست الحيطة" كان متباينا من مكان لآخر، تقول بلاطة "في المنصورة والأقصر رد الفعل كان عنيف جدا، يعني مسحوا مثلا جرافيتي لست الحيطة كان مرسوما على الكورنيش عشان بيدمج بين المرأة والقطط، بس في إسكندرية كان أحلى وألطف رد فعل على الجرافيتي، وفي حد اتبرعلنا ب 200 جنيه عشان أدوات الرسم والبوية، وفي القاهرة، الناس زعلت عشان مبنرسمش جرافيتي ضد "مرسي"، برغم إنهم فرحوا وتفاعلوا مع الجرافيتي الخاص بالمرأة اللي رسمناه".
وترى إنجي، أن المشروع أدى أغراضا أكبر من دعم قضايا المرأة، لذلك فهي قررت البداية في التحضير لفيلم وثائقي، يرصد مراحل إنتاج هذا المشروع، "الفيلم هيعملوا وهيشارك في صناعته الفنانين اللي رسموا الجداريات".