إعلان وظائف خالية: لو شايف إنك راجل وعايز تاكل عيش.. قدم

إعلان غريب لفت انتباه جميع قراء الصحيفة المتخصصة فى الإعلانات؛ «مصنع يطلب عمالاً» هذا هو مضمون الإعلان، الذى كتبه صاحبه بصيغة مختلفة عن الإعلانات الأخرى فبدا غريبا، يقول الإعلان: «لو شايف إنك راجل تقدر تستحمل الشغل.. يعنى عايز تاكل عيش.. إحنا بندور عليك بشمعة.. مرتبك معنا كبير.. ولو انت راجل هيزيد، وهتاخد بدل سهر ومكافآت وحوافز إنتاج وتأمينات اجتماعية.. كل اللى حتطلبه هتاخده بس ادينا الشغل اللى احنا عاوزينه.. بدل ما انت قاعد فى البيت قدام النت قوم كن راجل نافع».
تلك هى الكلمات التى صيغ بها الإعلان الذى تداوله نشطاء مواقع التواصل الاجتماعى لغرابته، تقول رباب مصطفى، أحد مسئولى العلاقات العامة، إن هذا الإعلان لفت انتباه كثير من الشباب الذين بادروا بالاتصال بالمصنع، «طريقة جديدة من نوعها، فقد اعتدنا على الطريقة التقليدية فى طلب موظفين أو حتى عمال»، وتضيف: «المصنع يطلب عمالاً وموظفين جادين ويعملون بكفاءة، لأن هذه النوعية من العمالة غير متوافرة ونادراً ما نجدهم».
الغريب أنه رغم ارتفاع نسبة البطالة فى المجتمع المصرى، فإن صيغة الإعلان بدت وكأن المصنع «يدلل» على شباب راغب فى العمل ولا يجده، وتقول رباب: «المشكلة إن فيه ناس بتيجى بس مش جادة.. بيطلبوا إجازات كتير، وغير منتظمين فى الحضور والانصراف.. ما يعطل العمل ويجعل الاعتماد عليهم ضعيفاً».