مرسى ده روحى روحى روحى!!

* فى الفيلم الأخير الحائز على الأوسكار argo والمقتبس عن قصة حقيقية.. يقول رئيس الأركان: «السفلة فقط هم من نقف إلى جوارهم».. تذكرت هذه الجملة بعد زيارة جون كيرى الأخيرة إلى مصر.
* س: هل يجرؤ أكرم الشاعر على نزول الانتخابات البرلمانية فى بورسعيد؟
ج: هو ممكن ينزل.. إنما يبقى يشوف مين هيطلعه (بالمناسبة: الأمر نفسه ينطبق على عصام سلطان فى دمياط).
* قبل الانتخابات كان الرئيس مرسى دائم الاستعانة بقصة البغلة التى لو عثرت فى العراق لسئل عنها عمر.. بعد توليه الرئاسة جارٍ البحث عن البغلة، ويقال إن زيارة هشام قنديل الأخيرة للعراق كانت لهذا السبب.
* بعد تهديد الألتراس بالقصاص أو الفوضى، يقال إن الإخوان لم يعقبوا، حيث قال المرشد: وهو فيه فوضى أكتر من اللى إحنا فيها؟؟
* س: ما هى أكثر سور القرآن التى يحبها الإخوان؟
ج: سورة الكهف، لأنها تذكرهم بأيام المحظورة وبقائهم فى الكهف 80 سنة، وسورة (المائدة) لأنها تذكرهم بمائدة التفاوض التى يسارعون للجلوس إليها (لما يتزنقوا)، وأكيد أكيد سورة (النساء).
* قالت لى سيدة فاضلة: وهو انتو عايزين تروحوا الجنة عشان النسوان بس.. رددت عليها: على حد علمى الجنة مش هيبقى فيها نسوان.
* سألنى: هل ينام الرئيس مرسى مع كل هذا (اللبش) الموجود فى البلد؟؟ رددت: وبيشخر كمان. الفرق بينه وبيننا أنه (بيشخر) وهو نايم.. فيما صرنا - فى عهده - (بنشخر) وإحنا صاحيين.
* كابتن كابتن.. عشان ما تمثلش كتير بس.. الشعب مع المنتصر أياً كان. انت اللى علّمته كده لما كبرت دماغك منه وركزت فى السياسة ونسيت البنى آدم. اخشع (من اخوك مليجى)
* هو ليه الناس بتراهن ع الجيش كبديل.. ليه مُصرّين نتحكم بمبدأ قضا أخف من قضا.. هو مفيش أمل البلد دى يحكمها حد نضيف ومش ملطوط.. كله متعلم عليه؟؟
* وحتى لو يائس أو بائس أو قرفان أو شايف الدنيا خربت.. فرصة يا أخى تفكر فى الآخرة.
* مصر الآن مقسمة بين فريق التأييد الدائم.. وفريق الرفض الدائم.. وفريق عبوكو كلكو. والأخير هو حزب الأغلبية.
* اللى اختشوا.. صحيح ماتوا.. بس فضلوا مستورين، وفضلت الناس تفتكر الستات اللى طلعت عريانة من الحمام طول عمرهم، وتبصلهم بصة مش كويسة.. نفس الكلام فى السياسة على فكرة.
* قرأت تقرير مركز المعلومات الأخير عن البرامج التليفزيونية. التقرير بتاريخ فبراير واتعمل فى يناير. ياسر على مالوش دعوة بيه. بلاش هرى. اتحرق خلاص.
* سؤال: لو قررت جبهة الإنقاذ التراجع ونزول الانتخابات.. هل سنرى تراجعاً من عدد من المقاطعين المحسوبين عليها وتبريراً لهذا التراجع؟؟. وقتها لن يختلفوا عن الإخوان.
* القاعدة التى لا تموت فى مصر ولا تتغير: البلد دى يا تعيش فيها مهدد.. يا تعيش متهدد.