ب"نظارة سوداء وكارنيه".. "نصاب" ينتحل صفة ضابط شرطة للحصول على أموال المواطنين بالدقي

تتعدد وقائع النصب والاحتيال في مجتمعنا والتي كثيرا ما تسجل في نهاية المطاف "ضد مجهول"، إلا أن في ابتكارها وطريقة تنفيذها يجعل من الضحية لقمة سائغة بين براثن الجاني الذي يحاول بشتى الطرق أن يخرج ما في جيب الضحية دون مقاومة تذكر حتى يعلم الضحية فيما بعد أنه كان بطلا في قصة جديدة من النصب برع مخترعها بأن يوقع بضحيته ويأخذ ما في جيبه ثم يولي مدبرا.
النصاب قال لي بعد أن أخرج الكارنية: "أحنا شرطة علشان تكون مطمن"
يوم الثلاثاء الماضي الموافق 10 مايو من العام الجاري استوقف شخص أحد المارة بشارع السودان بدائرة قسم الدقي، طالبا منه أن يأتي ليلبي نداء "الضابط" حتى ذهب معه المواطن الذي يدعى "جمال مهنا" إلى السيارة التي يجلس بها الضابط والذي بادره بإظهار ظهر كارنية الشرطة وقال له "أحنا شرطة علشان تكون مطمن".
اطمئن المواطن إلى محدثه بعد أن أظهر له ظهر الكارنية الذي يحمل نسر الشرطة ومن ثم بدأ الحديث معه، ويقول مهنا "كنت عند واحد صديقي واخد منه 800 جنيه علشان أوصلهم لحد أمانة، وكنت تحت كوبري الدقي ولقيت حد بينده عليا تعالى كلم الباشا، كان قاعد جنب السواق ولابس نظارة سوداء وقميص نبيتي كاروهات ووراني ظهر الكارنيه كان أزرق وقالي أحنا شرطة علشان تكون مطمن".
ويضيف الرجل "سألني أنت منين قولتله أنا من الدقي، قالي ممكن أسالك كام سؤال.. حد من المنطقة دي عرض عليك تشتري سلاح، أنت عارف أن البلد في حالة إرهاب وأخرهم الضباط اللي اتقتلوا في حلوان، بعدها قالي حاول تساعدني علشان عايزين نقتحم الأماكن دي، فسكت وساعتها حسيت إني بتكلم مع ضابط من أمن الدولة".
وطلب النصاب منه أن يريه بطاقته، وطلب منه أن يركب معه السيارة الملاكي، موضحا: "قالي أركب معانا وبعد ما ركبت وراه قالي بعد إذنك عايزين نشوف الورق اللي معاك ووريته الروشتتات بتاعة الدكاترة والتحاليل وبعدين قالي ممكن أشوف الورق اللي في جيبك وريتهوله وبعدين لفه بسلوتيب، وقالي إيه تاني في جيبك قولتله فلوس قالي ممكن تكون مزورة وبعدين طلعتله الفلوس بص عليها ولفها في ورقة ومضي عليها وقالي علشان لو أشرف بيه شافك يعرف اني تابعتك".
ويضيف الرجل بعد أن أدمعت عينه فور تذكره لتلك الواقعة: "كنت باخد علاج للمرارة غلط وكان مأثر عليا طول الوقت وصوتي وقت الواقعة ماكنش طالع وكنت منهك تماما ومكنتش مركز في أي حاجة"، متابعا: "بعد ما رجعني تاني لنفس المكان اللي خدني منه روحت على طول للدكتور ولما جيت أطلع الفلوس الملفوفة في الورقة لقيتهم ورق جرايد".
دفعت الواقعة "مهنا" بأن يجري اتصالا هاتفيا بأحد ضباط قسم الدقي الذي طلب منه الذهاب للقسم وتحرير المحضر اللازم بالواقعة، وعلى الفور عرض الضباط عليه العديد من صور المسجلين خطر والتي تمتلئ بهم أدراج القسم، فيقول: "القسم ساعدني وطلعولي كل صور المسجلين وطلعت أشكال قريبة من ملامحهم بس واضح أن دول مش مسجلين"، مضيفا: "اتعمل المحضر وتأيد جنح برقم 8284 قسم الدقي والواقعة حصلت الساعة 6.20 مساءً، وبعدها نزل ضابط بالقوة لمكان الواقعة ولحد دلوقتي ماوصلناش لحاجة".
وبصوت غلبه اليأس، يقول الرجل الخمسيني: "النصابيين بيعملوا الحجات دي باسم الشرطة لأنه كان بيدعي إنه ضابط وبيدي للعيال اللي معاه أوامر كأنهم عساكر"، موضحا "أنا عايز أوصل صوتي للناس يمكن أحمي بيه ناس تانية أن النصب بقى بكارنيه الشرطة ويمكن يكون الكارنية متاخد من شخص متوفي وبينصبوا بيه".