فى السفر أكثر من 7 فوائد

كعادتنا كل أسبوع يتجول فريق «أصحاب» بين أكبر أماكن تجمع الشباب فى الكافيهات فى محاولة للوصول إلى آخر أفكارهم وما يشغلهم وما يدور فى رؤوسهم من أفكار وتطلعات وأحلام الغد إن وجدت، وبالدخول إلى أحد الكافيهات، التقينا بمجموعة من الشباب وجلسنا معهم لنعرف أكثر ما يشغل بالهم ومحور حديثهم...
فى أحد مقاهى الزمالك جلس مجموعة أصدقاء، تعرفنا إليهم وقال محمد منجاوى (27سنة): «إحنا بنتكلم فى أكتر من موضوع بس أكتر حاجة بتشغلنا حالياً السفر، أولاً نفسى أسافر سياحة عشان أشوف ناس جديدة وثقافات جديدة وأعيش مغامرة مختلفة وتطور الموضوع لأنى عايز أسافر شغل وأعيش بره، فى الأول كنت عايز أسافر أشتغل وأتعلم وآخد خبرة من سنتين لخمس سنين مثلاً وبعد كده أرجع على شركة كبيرة أو أفتح شغل خاص بيّا أو بتعاون مع أصدقائى، بس بعد اللى بيحصل فى البلد والحياة الصعبة ابتديت وفكرت جدياً ودورت فعلاً على فرصة سفر شغل وابتديت أتواصل مع معارف ليّا لتحقيق حلمى ده، ومش بس كدة أنا وصل بيّا الأمر فعلاً بأنى أعيش بره».
وأكمل صديقه يوسف المعتز (20 سنة): «مفيش حد مش عايز يسافر وكل واحد عنده سبب، بالنسبة لى عايز أسافر عشان أتعرف على العالم ودى حاجة متعلقة بدراستى كمان، السفر بالنسبة لى متعة عايز أعرف حضارات العالم المختلفة وعادات وتقاليد أكثر من دولة وأشوف أماكن جديدة ده فى حد ذاته حاجة حلوة جداً، وأكيد بادور وباجتهد إنى ألاقى فرصة مناسبة وباسأل كل معارفى عشان أقدر أوفر الفرصة دى، بتمنى الفرصة تجيلى، وأكيد أنا لو شايف الوضع أو مستقبلى هنا أفضل مكنتش هاتمنى أسافر، بس برضو مع ذلك أنا شغال حالياً فى مصر فى شركة، وبادور وباعمل اللى عليّا عشان ربنا يكرمنى».
وتحمس صديقهم الآخر أحمد مجدى (27 سنة) وانخرط فى الحديث قائلاً: «السفر بالنسبة لى تغيير كُلى بمعنى إنه باشيل هموم وبافصل دماغى شوية عن الشغل والحياة عموماً، أىّ حد مننا بيكره الروتين وبيحب يكسره والسفر هو اللى بيساعد فى كده، بالنسبة ليّا تغيير دم أو تجديد حياة، دايماً فيه ناس معينة تحب تسافر معاها علشان بيعرفوا يفصلوا ومجانين والسفر عايز جنان علشان زى ما قلت حاجة نكسر بيها الروتين، والسفر بيخلينى أقدر أستحمل وأكمل مع الحياة بما فيها من ضغوط، مجربتش أسافر لوحدى بس ناوى أعملها إن شاء الله، بالنسبة لى بطبيعة أى شاب مصرى اللهم هجرة أصلاً مش سفر، بس لو حنتكلم من باب كسر الروتين فالجانب المادى بيتحكم هنا والأمنى كمان، فممكن نقول ماليزيا أو تركيا مع إن تركيا داخلة على الفيزا الشنجن وشكلها حتقفل فى وشنا هى كمان، بس عموماً عايز أسافر كمان مهرجان أبيزا فى إسبانيا أو مهرجان ريو دى جانيرو فى البرازيل».