"الوادي" تنشر نص تحقيقات النيابة العسكرية مع متهمي "القرصاية"

قام مركز الهلالى للحريات بنشر أقوال ال 25 متهما عسكريا في قضية جزيرة القرصاية من الفلاحين وصائدي السمك وبائعيه وعمال اليومية الذين يقومون ببعض الأعمال على أرض الجزيرة، موضحا أن أقوالهم في التحقيقات تخلو تماما من أي اعتراف بالعدوان أو تلقى الاموال كما ادعى المتحدث العسكرى بإسم القوات المسلحة أول أمس، بل على العكس تثبت القبض عليهم عشوائيا والتعدي عليهم، خاصة أن أوراق القضية تخلو تماما من ادعاءات المتحدث العسكري على الأهالي، مطالبا في الوقت ذاته بالتحقيق في تلك التصريحات والتي تمثل عدوانا على الأهالي الابرياء ومحاولة لتبرئة ساحة القوات التي هاجمت أهالي الجزيرة بعدوانية غير مبررة.
وطالب "الهلالى" وزير الدفاع عبدالفتاح السيسي بفتح تحقيق شامل في القضية ومحاسبة المتورطين هجوم قوات عسكرية على الجزيرة فجر 18 نوفمبر والتعدي على الفلاحين والصيادين وعمال اليومية والذى أسفر عن سقوط الشهيد محمد عبد الموجود والتعدي على المواطنين كما هو ثابت بالتحقيقات.
"الوادي" تنشر نص أقوال المحاكمين عسكريا كما وردت بالتحقيقات وفقا للهلالى والتى تخلو من اى اعتراف بتقاضى اموال مقابل الاعتداء على أراضي الجيش كما قال المتحدث باسم الجيش أول امس فى مؤتمر صحفى .
1: خالد عامر سليمان..
"في شخص يدعي محمد يوسف طلب مني انفار عشان ينقلوا الاشجار والعروق الخشب من الكورنيش للجزيرة وهيديني سبعين جنيه علي النفر، فانا وفرت حوالي عشرة افراد ورحنا وكان معانا الشجر اللي هنزرعه واشتغلنا وانهارده حوالي الساعة 5 صباحا فوجئنا بوجود افراد من القوات المسلحة بيقولولنا ان دي ارض مملوكة للقوات المسلحة وبعد كده انا سلمت نفسي نظرا لوجود بتر في ذراعي الايسر وانا كمان معرفش ان دي ارض مملوكه للقوات المسلحة".
2: أشرف فرج الله..
"انا نزلت من منزلي الساعة 2 ليلا الليلة اللي فاتت لأني بشتغل صياد ورميت الغزل وكنت في المركب انا وزميلي طاهر سمارة ولميت الغزل فلقيت بعد صلاة الفجر مركب محملة عساكر قبل كوبري الدائري فانا شغال عادي بنية اني مش مخالف فلقيت مقدم بينادي عليا في الميكروفون بيقولي سلم نفسك فرحتله اسأله انا مخالف في ايه ولسه بطلع الورق راحوا مطلعينا عندهم انا وزميلي طاهر سماره وسابوا المركب ونزلونا تحت وودونا علي مركب تانية".
3: طاهر سماره محمد..
"يوم 18 الساعة الخامسة والنص اثناء تواجدي بالنيل بأول الجزيرة عشان انا بشتغل صياد انا وزميلي اشرف فرج الله فوجئت بأفراد القوات المسلحة خدوني وجابوني علي هنا".
4: عمر محمد حسانين..
"أنا بشتغل انا واخويا صيادين واخويا بعتني ابيع سمك للعمال اللي بيشتغلوا في فيلا المهندس احمد وانا هناك فوجئت بعد دخول الفيلا واثناء قيامي بإعطاء السمك للعمال باقتحام افراد الجيش لباب الفيلا ودخلوا قبضوا عليسا انا والعمال الموجودين".
5: محمد ربيع متولي عوض..
"خالد عامر قالي في شغل باليومية في قطعة ارض نزرع اشجار رحت معاه من يوم الجمعة ولما وصلنا بدانا نشتغل وكان معايا حوالي عشر عمال وقعدنا هناك لمدة يومين وعملنا بعض الخيام واحنا نايمين لقينا افراد الجيش دخلوا الارض وقعدوا يقبضوا علي كل العمال الموجودين وضربوا علينا نار وقعدوا يضربونا بايديهم في اجسامنا وكهربونا بالصواعق ومكنتش عارف همه بيعملوا كده ليه".
6: صابر عبده حامد..
"أنا كنت متواجد انا والمدعو ياسر علي داخل المركب الساعة 6 صباحا ..بجزيرة القرصاية لصيد السمك وفوجئت بأفراد القوات المسلحة قادمة داخل الجزيرة فنزلت من المركب انا وياسر ففوجئت بأفراد الجيش يصحبوني معهم ويقبضون علينا ونحن لم نتعدى علي افراد القوه او نتعدى علي ارض".
7: أحمد محمود عبد الحليم نصار..
"أنا كنت رايح من البيت للشغل لقيت عساكر جمب فيلا المهندس احمد وانا برمي السلام قالولي انت جاي هنا ليه وضربوني وانا كان معايا الفاس بتاع الشغل وجابوني علي هنا".
8: محمود شعبان سالم..
"اللي حصل ان خالي سالم بلغني ان المهندس احمد بدوي عاوز بعض الافراد والعمال لزراعة وتشجير ارض خاصة به باليومية ..واشتغلنا وانهارده الفجر حوالي الساعة 5 صباحا اثناء تواجدي بدخل الفيلا ونومي هجموا علينا وقبضوا علي".
9: جمال علي مصطفي..
"أنا شغال باليومية وبزرع شجر وبشتغل في جزيرة القرصاية ورحنا انا وناس تانية عشان نزرع شجر علي أرض الجزيرة وفي اليوم ده احنا تأخرنا وملقناش مراكب تعدينا فبيتنا هناك عشان كان ناقض خمسين شجره كنا هنزرعهم الصبح ..والفجر الجيش جه وقبضوا علينا وضربونا ".
10: محمود عبد المعطي..
"اللي حصل ان انا صحيت الفجر وكنت رايج الجامع لأني معايا مفتاح الجامع فلقيت ضرب نار من كل حته جريت من الخوف ووقعت تلات مرات ومسكوني قالولي كلم الضابط واول ما رحت ضربني بالشلوت وسألني علي سلاح وفتشني وملقاش معايا غير التليفون والسجاير وأخدوني علي الباجور تحت وكل شوية يجيبوا ناس ويرموهم، ماليش علاقة بالموضوع ده وانا اخدوني من مكان بعيد عن الارض اللي الجيش بيقول انها بتاعته" .
11: مصطفي علي عيسي..
"وأنا طالع من صلاة الفجر انا وعبد المعطي احمد وقابلنا قوات الجيش سألونا جايين منين قلنالهم كنا بنصلي ..وملناش علاقة بالخناقة ..احنا بعيد عنها يجي 3 كيلو ..اخدونا وودونا ع الباجور" .
12: سمير حسن سليم..
"أنا جالي خالد عامر وطلب مني اشتغل باليومية في زرع اشجار في الجزيرة ورحنا واثناء تواجدنا هناك في العمل فوجئنا بالجيش يقبض علينا ."
13: عبد المعطي أحمد عبد المعطي..
"أثناء صلاة الفجر سمعت صوت اطلاق نار ..فخرجت وذهبت الي مصدر الصوت فلقيت العقيد حسام وحال ذهابي اليه قبضوا عليا".
14: محمد عبد الله محمد سالم..
"يوم 17 نوفمبر اتصل بيا المقاول خالد عماره وطلب مني اروح الجزيرة عشان اشتغل في زرع الشجر باليومية وخلصنا الشغل فطلب مننا المبيت لإنهاء العمل وهيزود اليومية فبيتنا والفجر جه الجيش قبض علينا".
15: عبد الرحمن عبد المعطي محمود..
"أنا كنت بصلي الفجر انا واخويا وابن اخويا في مسجد ابو العينين واحنا خارجين الجيش كان بيلم اي حد واخدونا وجابونا هنا".
16: إبراهيم علي يونس..
"يوم السبت لما رحت الشغل بتاعي عند المهندس احمد لقيت ناس موجوده علي الجزيرة فاستغربت ان الجيش مش موجود سالت الجيش فين قالوا اهل الجزيره كل واحد اخد ارضه وبعد كده روحت وجيت انهارده الصبح قالولي الجيش هجم علي الجزيرة واول ما دخلت الفيلا اللي انا شغال فيها الجيش هجم علينا جوه الفيلا وحدونا وضربونا وجابونا علي هنا".
17: عصام علي محمد منصور..
"أنا بشتغل عند المهندس احمد وراجع من اجازتي امبارح 11 ليلا وبالنهار الصبح لقيت خبط جامد علي الباب وكسروا الباب ودخلوا وقالوا فين السلاح ونزلوا فينا ضرب وجابونا علي هنا".
18: ياسر علي أحمد..
"اللي حصل انا نزلت الساعة الخامسة فجرا اليوم عشان اصطاد بالمركب بتاعتي ورميت الشبك عشان اصطاد ولميت الشبك بعد ما سمعت ضرب النار فلقيت ضابط وعساكر كانوا واقفين علي الجزيرة ندهوا عليا فرحتلهم فأخذوني ورموني في الباجور الكبير بتاعهم وجابونا هنا".
19: محمود شعبان سالم..
"أنا جالي واحد اسمه سالم وقال اطلع معاهم السبت وشوية عمال من البلد عشان شغل ورحنا زرعنا جذور نخل واشجار زينة وقعدنا هناك يومين ولما الليل جه علينا جابلنا عشا واتعشينا ونمنا وفي حوالي الساعة 4 فجرا فوجئت انا والعمال اللي معايا بالجيش بيهجم علينا ولما سالت ليه قالوا اصل الارض دي بتاعة الجيش".
20: سامي شحاته صالح..
"يوم السبت سالم اخويا قالي في واحد عاوز يزرع شجر في ارضه في الجيزة فانا وافقت ورحت معاه وخلصنا شغل ورحنا ننام في الفيلا بتاعة صاحب الارض وفوجئنا جوالي 6 صباحا بصوت ضرب نار بعد كده الجيش جه وقبض علينا"
21: هاني عشري رفاعي..
"جالي واحد صاحبي اسمه خالد وقالي تعالي معايا نروح نزرع شجر في ارض ف الجيزة ورحنا وقعدنا هناك لمدة يومين واليوم الاحد 18 نوفمبر حوالي الساعة 6 صباحا ..كان في ناس ف الارض اللي جمبنا بيضربوا نار ..وفوجئت بعساكر قوات مسلحة جايه تجري ف الارض وكانوا بيكسروا كل حاجة في الارض ..وقبضوا علينا".
22: سالم شحاته صالح..
"المهندس احمد بدوي اتفق معايا انا وزمايلي نروح نزرع حته ارض طينية في الجيزة ورحنا وبعد ما قمنا بزراعة وتشجير الارض فوجئنا بالجيش بيقبض علينا".
23: حسن شعبان سالم مرسي..
"اللي حصل ان خالي سالم بلغني ان المهندس احمد بدوي عاوز بعض الافراد والعمال لزراعة وتشجير ارض خاصة به باليومية واشتغلنا وانهارده الفجر حوالي الساعة 5 صباحا اثناء تواجدي بدخل الفيلا ونومي هجموا علينا وقبضوا عليا" .
24: ماهر يوسف ابراهيم..
"اللي حصل ان في يوم الاحد 18 نوفمبر حوالي الساعة الرابعة والنصف فجرا فوجئت بأصوات ضرب نار جاي من معسكر القوات المسلحة فأنا مرضتش انزل عشان اصلي الفجر وبعد كده بنص ساعة جالي عقيد البيت وقالي تعالي كلم قائد المنطقة فنزلت عشان اكلم قائد المنطقة فخدني في المركب وجابني علي هنا".
25: حسن شحاته صالح..
"أخبرني شقيقي سالم ان في شغل في جزيرة القرصاية" ية لزرع اشجار هناك وتوجهت الي هناك انا وشقيقي سالم وسامي شقيقي الاخر الي هناك لنعمل بزرع الاشجار باليومية مقابل خمسين جنيه في اليوم وبعد الشغل رحنا فيلا المهندس احمد نبات والصبح الساعة 6 سمعنا طلق ناري وتم القبض علينا".