مع السلامة يا عم اسماعيل

مات عم اسماعيل عبد الحافظ ( عم اسماعيل ) اللقب اللى كان بيحب يسمعة واللى كان معروف بية فى الوسط الفنى.
عم اسماعيل للى ما يعرفوش هوا ابو الدراما التليفزيونية الحديثة هوا اللى عمل المصطلح دة أصلا هوا وتؤمة الفكرى والفنى أسامة أنور عكاشة للى عايز يعرف مين عم اسماعيل، عم اسماعيل هوا ليالى الحلمية، والشهد والدموع، والوسية، وامراة من زمن الحب، والمصراوية، عم اسماعيل هوا جمهورية زفتى، وعفاريت السيالة، ولأصدقاء وخالتى صفية والدير ومسلسلات كتيرة تانية، هوا صاحب أشهر مشهد رومانسى فى الشهد والدموع هوا اللى خلا دموعنا تنزل فى وفاة حربى فى خالتى صفية والدير واللى خلانا نضحك مع سليمان غانم وسليم البدرى هوا اللى ضحكنا وبكانا وفرحنا وزعلنا كل المشاعر الانسانية خلانا نحس بيها ببساطة العبقرى وذكاء الموهوب وقدرة المتمكن من أدواتة هوا المخرج اللى خلانا نستنى مسلسلاتة من السنة للسنة مين فينا يقدر ينسى لؤم سليمان غانم فى ليالى الحلمية الفلاح اللئيم الحويط خفيف الدم صاحب المغامرات مع شريكة وقرينة سليم البدرى الوجية الأورستقراطى صاحب السيجار الشهير والمغامرات النسائية فى المسلسل ولا الفلاح المطحون المظلوم اللى حفر فى الصخر لحد ما بقى معاة الدكتوراة الفلاح اللى كان بيعيش على طقة واحدة فى اليوم علشان معاهوش فلوس يجيب طقة تانية الفلاح هوا خليل حسن خليل فى مسلسل الوسية مين يقدر ينسى تتر المسلسل اللى بيقول ( مين اللى قال الدنيا دى وسية فيها عبيد مماليك وفيها السيد) أوالست زينب اللى ربت ولادها فى الشهد والدموع ما أقدرش انسى شخصيات بسة والخمس والاسطى زكريا وشاهين وحافظ رضوان وحربى وصفية
وحسن كناريا وزينهم السماحى وعلى البدرى عم اسماعيل هوا الفلاح المصرى الحنون المحافظ الطيب المتدين وهوا العنيف والبسيط المثقف اللى من بساطتة تفكرة سهل ولكنة عندة خبرة السنين صاحب الضحكة الطيبة ولمعة العين اللى مليانة ذكاء وعبقرية المجنون اللى مستخبى تحت الجلابية المعجون بتراب الغيطان الفلاح ابن كفر الشيخ اللى فضلت القرية جواة لحد وفاتة الدراما المصرية بقت يتيمة يوم ما مات عم اسماعيل لو الدراما شخص كنت ممكن اسمع صوتة على لوعة فراق ابوة راح الوتد اللى كانت خيمة الدراما ببتشد علية اللة يرحمك يا عم اسماعيل كان نفس ابقى رسام علشان ارسم لوحة فيها كل شخصياتة وهيا بتودعة وعينها بتدمع كأنى باسمع سليمان غانم وزينب وسليم البدرى وزينهم السماحى وهما ماششين فى الجنازة ووبيندهوا علية ويقولو لة هتوحشنا يا عم اسماعيل يا أبونا وأخونا وعمنا وصاحبنا كام نفسى اكون موسيقى علشان اعمل مقطوعة عنى لكنى للاسف كما قال نزار قبانى لا شىئ معى سوى كلمات مجرد كلمات.