تعليقا على حادث البحيرة .. أسامة كمال: الإرهاب والإهمال لا دين لهما

قال الإعلامي أسامة كمال، أنه لافرق بين الإرهابي الذي يستحل قتل المواطنين بالقنابل والمتفجرات، وبين من يقتلهم دهسا بالسيارات في حوادث الطرق البشعة.
وأضاف، خلال مقدمة برنامجه «القاهرة 360» والمذاع عبر فضائية القاهرة والناس، معلقا على حادث البحيرة، والذي راح ضحيته 19 شهيدا، و17 مصابا، قائلا "حياة راحت بسبب إهمال أو بلطجة أو إرهاب أو مخدرات.. كلهم شبه بعض.. كلهم مالهمش دين، والعيال اللي اتفحموا، وأبوه مش عارف ابنه من زميله، كأنهم خارجين من معركة أو محرقة والتانيين ولا فارق معاهم حياتهم ولا حياة غيرهم، ومقضيينها في حالة تبلد مش مفهومة.. قطعوا قلوبنا وقلوب الدنيا.
وهاجم كمال سلبية المواطنين قائلا " أنتم السبب فى كده كلنا بنشوف الغلط وبنسكت وبنطنش وبنغمض عنينا ومعلش يا ريس.. وماله يا أستاذ.. فوتها يا باشا.. ماتحبكهاش عملنا زي الناس المحترمة اللي ماتسمحش للي ماشي غلط انه يعدي ان شالله اليوم كله يفوت واحنا واقفين" مشيرا الى أن تلك الحادثة ومثيلاتها تتكرر فى مصر "ولما تسأل متعرفش تحاسب مين وللا مين وللا مين.. بس أقدر أقول لكم اننا لازم نحاسب نفسنا كلنا".