الحزن يخيم على مواقع التواصل الاجتماعي في حادث البحيرة

خيم الحزن على مواقع التواصل الاجتماعي، بعد خبر الحادث الذي وقع صباح، اليوم الأربعاء، وأودى بحياة 18 طالبا، وأصيب فيه 17 آخرين، إثر اصطدام الاتوبيس الخاص بهم، بسيارة نقل وقود، في البحيرة.
فكتب نبيل بيشوي، أى أنسان يدافع عن الفساد والأهمال والتقصير فهو خاين وجبان، والرئيس منذ توليه لم يتخذ أي إجراء ضد هذه الفئة وسقوطه مرهون بذلك.
وأضافت أميرة الورد على صفحتها بموقع «الفيس بوك» "أهم الناس صاحين وملبسين عيالهم في أمان الله، يارب صبرهم وما تحكم علينا يارب، اكفينا شر الغيب يارب واحفظ ولادنا من كل شر وسلمهم.
وقال رامي يوسف: عندما تكون الطرق المصرية من اسوأ الطرق على مستوى العالم، وعندما نرى أن جميع سائقي النقل والأتوبيسات، يتعاطون المخدرات، فإن هذه الحوادث ومثيلاتها هي الناتج الوحيد، إذا فهي منظومة فاشلة.
واستطرد عبدالله تيجاني: إنا لله وإنا إليه راجعون.. كل يوم حوادث طرق، مستشفيات، مدارس، جامعات وكليات وغيره، فين المسؤولين فينك ياسيسسي حسبي الله ونعم الوكيل فى كل مسؤول في البلد دي.
بينما قالت أمنية سامي: الطريق ده وحش، غير كدا سواقين عربيات النقل، بجد ناس متهورين جدا، عموما ربنا يرحمهم لازم يتعمل اختبارات للسواقين النقل واللي ماينجحش مايسوقش تاني دي أرواح ناس.
محمد نصر الدين كتب: الرجاء رد فعل حقيقي، اتقوا الله، المفروض دلوقتي إقالة وزير الصحة والتعليم والنقل، لأنهم فشلة وحكومة مش عايزة تشيل وزير واحد علشان ميظهرش إنهم فاشلين، البقاء لله ويارب صبر أهلهم.
أبو خالد الزيات قال: ما الفارق بين موت جنود من عمل إرهابي قذر، وبين أطفال يقتلون نتيجة فساد وفشل وتواطئ المسؤولين.. لا أجد فارقا ويجب معاملة الخبرين إعلاميا بالتساوي.. ولكن لا أظن.
من جانبه قال محمد السيد: ملحوظة.. سوريا والعراق ماحصلش عندهم في أسبوع واحد، إن مات 14 طالبة جامعية و6 طلاب مدارس واتحرق 20 طالبا في أوتوبيس.. ياريت نغير عشان أحنا مابقيناش أحسن من سوريا والعراق.
أميرة وفيق كتبت: ساعة حادث أسيوط.. أتوبيس المدرسة اللي مات فيها 50 طفل، كل الإخوان قالوا قضاء وقدر، والعيب على السواق.. وباقي الناس، قالت إن هشام قنديل لازم يتشال ومافيش أي إجراء حصل.. فياريت بلاش شماتة في ناس ماتت، وكل واحد يفتكر قال إيه ساعتها لما كان مرسي موجود، إنه مش هينزل بنفسه يشوف المزلاقانات.. ربنا يصبر أهاليهم ويربط على قلوبهم.. ولازم وقفة ويبقي فيه قانون رادع فعلا، والمسؤول يتحاسب.
أحمد عبد الحميد قال: بجد بقى حرام اللي بيحصل دة.. مفيش طريق فيكي سليم يا بلد.. ومعظم السيارات ما ينفعش أصلا تمشي على الطريق.. كل شوية حوادث وإصابات.. الله يرحمهم ويصبر أهاليهم.. إنا لله وإنا إليه راجعون.